Стихи́:

Обагри́в себе́ червлени́цею свои́х крове́й, и Ерми́е посе́чен:

И о́ле пова́плению неужа́сну!

Ерми́я напра́сно стремгла́в мечь посече́ в три́десять пе́рвый.

Ерме́й Христо́в му́ченик, бе у́бо от гра́да Кома́на, во́ин же сый Антони́на царя́. И у́же бе стар, и белы́ вла́сы име́я. Испове́дания же ра́ди е́же во Христа́ ят бысть, и к Севастиа́ну кня́зю приведе́н бысть, и ну́дим бе пожре́ти и́долом, и не покори́ся, пе́рвие сокруши́ша ка́мением че́люсти его́, из лица́ ко́жу ему́ содра́ша, и искорени́ша зу́бы его́. Посе́м в пещь вве́ржен быв, и изы́де невреже́н. И отра́вы напое́н бысть, и ничто́же не прия́ зла. И напои́вшаго его́ волхва́ зе́лием, ве́ровати Христо́ви сотвори́ и Зань умре́ти. Посе́м свято́му исторго́ша жи́лы по всему́ телеси́ его́. И в коно́б разжже́н вве́ржен быв, и пребы́сть невреже́н. Посе́м о́чи его́ избодо́ша, и пове́шен бысть стремгла́в, и ту ноже́м главу́ его́ отре́заша.

Стихи́:

Вку́су мы́сленаго бы́лия Твоего́ Сло́ве

Пре́льсти де́ющаго, гор́ек посече́ мечь.

Стихи́:

Рве́нием о́гненым опале́на бы́ста, страда́льца два,

Страша́щеся ника́ко [ко огню́ паля́щеся, ника́ко] ко огню́ паля́щему.

Стихи́:

Оде́жда пе́рвие, ны́не же пятери́ца Го́сподеви,

Му́же влеко́мь распя́тие, и простре́ся стра́нно

Сей святы́й великому́ченик Христо́в Филосо́ф, бя́ше от страны́ алекса́ндрския, я́коже вели́кий в по́стницех Анто́ний испове́да, и ка́ко муче́ние тече́нию соверши́в. Вертогра́д бя́ше красне́йший, и вся́кия доброде́тели испо́лнен. И в нем одр бя́ше положе́н мучи́телев, и велми́ зело́ укра́шен. Положе́н же бысть той Филосо́ф спа́ти верху́ его́, свя́зан рука́ма и нога́ма. И словеса́ льсти́ва и неудо́бна от предстоя́щия ему́ та́мо проны́рливыя жены́ слы́шаше, и очи́ свои́ до́блии сомжа́ше, зане́же не зре́ти ю. Ве́жди же и слу́ха не моги́й затули́ти, свя́зан сый, не имя́ше что сотвори́ти. Сие́ же сотвори́. Язы́к свой зубы́ куса́я, и мно́ги боле́зни себе́ нанося́, пребыва́ше не слы́ша, и ноздре́й не моги́й заткну́ти, нечи́стаго о́ного одра́ моча́ше язы́ком свои́м крова́вым и оде́жу окровави́ зело́. И та́ко без вреда́ пребы́сть. И си́це подвиза́ся до́блий не поко́рся, главу́ ему́ отсеко́шя, и есть веселя́ся ве́чне на небесе́х.

Блаже́н у́бо челове́к бра́тие и́же и́мать страх Бо́жий в себе́. Сицевы́й у́бо я́ве Святы́м Ду́хом блажи́мь есть. Блаже́н мужь боя́йся Го́спода, таковы́й бо кроме́ есть сете́й вра́жиих, и вся́кого неприя́зньства сове́та и ла́яния. И́бо име́яй страх Бо́жий в души́, удо́бь отганя́ет от себе́ дия́вола злохи́трца. И ничи́мже его́ плени́т, зане́ бои́тся Го́спода, и по́хоти плотьски́я не прие́млет, ни глуми́тся пусто́шным зде. Ожида́ет бо своего́ Влады́ки, егда́ внеза́пу прии́дет и обре́т не пригото́вившыяся, и разлучи́т без вре́мене от жития́. Име́яй страх Бо́жий в себе́, всегда́ трезви́тся, и сну ле́ностну не вдаст себе́, бдит бо и ожида́ет Го́спода своего́ прише́ствия. Ни обьяда́етжеся, да не прогне́вает своего́ Влады́ки. Но испытова́ет всегда́ себе́, ка́ко уго́дная Бо́гови всегда́ твори́ти, да прише́д Господи́н его́ возвесели́тся о нем и похва́лит его́. Вся́кому бо стяжа́вшему страх Бо́жий, удо́бь бла́га вина́ спасе́ная ве́чней жи́зни быва́ет. Не име́яй же стра́ха Божия в себе́, пови́нен есть таковы́й дия́волим начина́нием, и глуми́тся с похотми́ сумня́ся. Спит без числа́ от уны́ния, и о гресе́х свои́х не ради́т, вмести́лище быва́ет похоте́м, зане́ все не подо́бно сло́во и жите́йское виде́ние в нем есть, и не бои́тся прише́ствия Влады́чня, ни помышля́ет о сме́рти свое́й. Сицевы́й кра́сит страсть, поко́ю ра́дуется, озлобле́ния бе́гает. Смире́ние же ме́рзит ему́, горды́ню лю́бит. Про́чее же внеза́пу прии́дет Господи́н его́, и обря́щет его́ во всех не гото́ва я́же уго́дна ему́ суть, и разлучи́т и́ неми́лостивно, и по́слет и во тму кроме́шнюю. И кто у́бо не опла́чет такова́го. Поне́же у́бо безконе́чным му́кам пре́дан бысть, иде́же несть избавля́ющаго, ни поми́лующаго. Сего́же у́бо бра́тие вси потщи́мся убежа́ти зла, творя́ще во́лю Бо́жию во стра́се, да сподо́бимся и мы вни́ти в ра́дость Го́спода своего́, ю́же обеща́ творя́щым во́лю Его́.

Молю́ у́бо вы ча́да, Го́спода ра́ди смире́ние люби́те, зане́же и сам смири́ся Госпо́дь нас ра́ди до сме́рти и распя́тия. Те́мже и вы у́бо бу́дите подо́бни Ему́. И та́ко победи́м го́рдость дия́волю свои́м смире́нием. И́бо Госпо́дь смире́ния де́ля рече́, и́же хо́щет вя́щший бы́ти в вас, то бу́ди всех мний, и всем слуга́, и всем раб. И́же бо а́ще вознесе́тся, то той пони́зится, а смиря́яй себе́, вознесе́тся, и вся хотя́щая ему́ да сокруша́тся зла́я. Вы́сяй бо ся и́дет в пре́дняя а́ду в бе́здну о́гненую. Молю́ же вы у́бо ча́да послуша́ние стяжи́те без прекосло́вия. Послуша́ние бо жи́зни ве́чней ма́ти есть, преслуша́ние же ма́ти поги́бели. Зане́же послуша́нием и смире́нием вни́дем в Ца́рство небе́сное, и жизнь ве́чную насле́дуем.

Вои́стину бра́тие вели́к есть пред Бо́гом мужь ми́лостивый. Ми́лостыня же есть егда́ с любо́вию быва́ет и с до́брым изволе́нием. Не мни я́ко дая́й не приобрета́я благода́ть, но ве́лию по́лзу прилага́я. Не дая́й же, ничто́ же себе́ приобрета́ет, то́кмо поги́бель. Слы́шати же досто́ит и се, я́ко у́не есть не твори́ти добра́, не́жели сотвори́в уныва́ти и оскорбля́тися. Почто́ скорби́ши челове́че, еда́ не наде́ешися от Бо́га возда́ния; Вои́стину умно́життися зла́то на небе́си. Но зде ли хо́щеши возда́ния, то почто́ оста́ви ми́лостыню; Ми́лостынею бо а не ку́плею, мно́зи и зде восприя́шя. Но восприе́мших зде не блажи́м. Не бу́дет бо мзды бо́ле о́ноя, зде ра́дующихся восприя́тию. И́бо Христо́с не та́ко даст ти та́мо мзду, пострада́вый за ны кро́вию. Те́мже не испыту́й дая́ ми́лостыню; Но повеле́ное ти твори́ со вся́цем тща́нием, наипа́че же в беде́ су́щим ру́ку по́мощи пода́й. А́щели же и мужеуби́йца есть или́ разбо́йник, но поне́же про́сит хле́ба Бо́га ра́ди, дай ему́, ве́мы бо я́ко вмени́ттися во мзду. Но у́бо Влады́ка Свои́м со́лнцем осия́я и́ ра́вно с тобо́ю, ты же дневны́я пи́щи недосто́йна су́диши и́. Те́мже и́ не истяза́й, я́ко Христа́ ра́ди прие́млеши и́. А́щели не всех поми́ловати хо́щеши, и иску́сна избира́еши глаго́ля, тем попе́куся то́чию, а о о́нех небрегу́, се ни́чтоже ве́лие; Но ве́лие у́бо а́ще у́зриши зле стра́жущаго, поми́луй и́, да и ты сподо́бишися от Бо́га ми́лости. И́бо того́ ра́ди нарече́т ся ми́лостыня, да и недосто́йным подае́м. А́ще бо недосто́йных отвраща́емся, а досто́йнии к нам не прии́дут, кому́ бо и да́мы. А́ще бо хо́щеши испытова́ти, та́ко и Бо́га твори́ти и́мать о нас, да от Вы́шняго Его́ человеколю́бия отпаде́м. Те́мже а́ще где ви́диши, не мини́, но поми́луй его́. Разуме́й, я́ко челове́к же есть из того́же естества́ роже́н. Разуме́й у́бо ка́ко ты о рабе́х печа́луеши, я́ко тре́бование их испо́лнити, сий же бо́льши ти сих послу́жит, предста́нет ти в день Су́дный, и и́змет тя от огня́. Что си́це возмо́гут ти раби́ твои́ сотвори́ти. Ми́лостивых же не то́кмо поми́ловании от него́, но и непоми́ловании лю́бят его́ о́нех ра́ди бы́вших благотворе́ний. А́щели что приключи́тся ему́, вси мо́лят зань Бо́га глаго́люще, Бо́же сотвори́ с ним ми́лость, и ми́мо веди́ скорбь его́, и да прии́дут ему́ вся блага́я. Не число́м бо дае́тся ми́лостыня, но любо́вию се́рдца. Я́коже о́ная вдови́ца две ме́днице в дар Бо́гу принесе́, па́че бога́тых похвалена́ бысть, вели́ку бо име́яше ве́ру. Того́ де́ля всего́ име́ния не пощаде́, но все име́ние Бо́гови принесе́; А́ще ве́ру прии́мет кто, ни еди́ныя спо́ны от убо́жества прии́мет. Та́ко не су́щу благотворе́нию, ни ка́кия по́льзы и́мамы от име́ния. Того́ ра́ди бога́тии и́же зли су́щии, па́че убо́гих му́ку прии́мут, поне́же не бы́ша ми́лостиви, и несть глаго́лали я́ко подади́м ми́лостыню. А́ще у́бо не с душе́вною любо́вию даю́т, ника́ко му́ки убежа́т. Не число́м бо дае́мых су́дится ми́лостыня, но любо́вию серде́чною. Во́нмем бра́тие словеса́ сия́ в сердца́ на́ша, о Христе́ Иису́се Го́споде на́шем. Ему́же сла́ва ны́не и при́сно и во ве́ки веко́в.