Стихи́:

Влеча́ше Иси́дора, наде́жда мечта́ния,

К посече́нию тече́ венца́ де́ля:

Иси́дора внеза́пу в четыренадеся́тый мече́м посече́.

Иси́дор Христо́в му́ченик, бе в ца́рство Де́кия царя́, от Алекса́ндрьскаго гра́да. Вои́нствуя же во оптио́нстем чину́. Вшед же в Хио́н о́стров в во́инских корабле́х, и та́мо к Нуме́рию оба́жен бысть Иулиа́ном со́тником я́ко христия́н. И ят бысть, и вопроше́н, а́ще Христа́ чтет. Он же рече́: «Во и́стину испове́дую Его́ Бо́га су́ща, я́ко Той сотвори́ не́бо и зе́млю, и мо́ре и вся я́же в них, и ве́рую Вонь». И за такова́я словеса́ в разли́чныя му́ки вложе́н бысть. Последи́ же мече́м сконча́ся.

Макси́м Христо́в му́ченик, ре́вность боже́ственую в се́рдцы нося́, ви́де не́когда идолослужи́тели, не то́чию преда́вшася и́долом, но и и́ны прельща́юща, веля́ща кла́нятися ка́пищу. И моля́ше Макси́м Бо́га уста́вити гоне́ние, и мно́ги крестя́. Еди́ною же твори́ме же́ртве, и всем е́ллином теку́щим со тща́нием, не то́чию жре́ти ско́ты, но и челове́ки, и не терпя́ сего́ зре́ти, но посреде́ я ста и обличи́ их я́ве. И́долы же дре́во и ка́мень нарече́, ни себе́ помощи́ могу́ща. Тогда́ ят быв от неве́рных, и бие́н мно́го. Последи́ же ка́мением поби́ша и́, и та́ко сконча́ся.

Стихи́:

Сла́вным отсече́нием тишину́ изобре́те,

Ско́рых потеко́мь Алекса́ндр от жития́.

Стихи́:

Трем страда́льцем отсе́чени бы́ша главе́,

Тро́ица три возлага́ет на них досто́йныя венцы́.

Стихи́:

А́бие па́ки тебе́ от теле́сных,

Душ блага́я песнь Бо́жий Ду́ше прегреше́нием.

Преподо́бный оте́ц наш Серапио́н, от ю́ности бысть мних, и не сниска́в све́та сего́ име́ния. Но та́ко бысть житие́ его́ я́ко еди́ному от птиц. Не стяжа́ бо отню́д ничто́же, ни в хи́же покрове́не седя́ше, но плащани́цу нося́ и ма́лое Ева́нгелие, та́ко хожда́ше я́ко безпло́тен. Мно́жицею же обрета́ху его́ вне ве́си на пути́ седя́ща и го́рко пла́чуща. И вопроша́ху его́ глаго́люще, что у́бо пла́чешися ста́рче. И отвещава́ше к ним, Госпо́дь мой поручи́л ми бе свое́ бога́тьство, и погуби́х е и истеря́х, и хо́щет мя му́чити. Они́же слы́шавше мня́ху я́ко о зла́те глаго́лет, и помета́ху ему́, ов ма́ло хле́ба, други́й овоща́. И глаго́лаху, возми́ бра́те, а о бога́тьстве е́же погуби́л еси́ не скорби́, мо́жет ти Бог посла́ти е. Отвещава́ше ста́рец, ами́нь ами́нь. Егда́ же па́ки и́де во Александри́ю, стре́те ни́ща от зимы́ дрожа́ща, и ста нача́ помышля́ти, ка́ко у́бо аз мня́ся по́стник бы́ти и де́латель Христо́в, ри́зу ношу́. Сей же ни́щий па́чеже Христо́с от зимы́ умира́ет. Вои́стину а́ще оста́влю умре́ти; я́ко уби́йца осуже́н бу́ду в день Су́дный. И сволк ри́зу свою́ даде́ ни́щему, и седя́ше наг под па́зухою держа́ свято́е Ева́нгелие е́же ноша́ше. И преходя́ не́кто зна́емь ему́, и ви́дев его́ на́га, и рече́, о́тче Серапио́не, кто тя совлече́. Он же изъе́м Ева́нгелие и рече́ ему́, се мя совлече́. И посе́м стре́те е́тера от ино́го держи́ма за долг, и не иму́щу что возда́ти ему́, сжа́лив си блаже́нный Серапио́н, взем Ева́нгелие продаде́ е, и даде́ за долг ну́жнаго челове́ка, и прии́де наг в хи́жу свою́. И егда́ ви́де учени́к его́ на́га, и глаго́ла ему́, где ма́лая ри́зица. И отвеща́ ста́рец, преди́ посла́х со ча́до, иде́же тре́буем в тоя́ ме́сто лу́чшия. И рече́ к нему́ брат, а Ева́нгелие ма́лое где. Глаго́ла ста́рец, вои́стину ча́до, то глаго́лаше ми по вся дни, прода́ждь име́ние и даждь ни́щым, да в день Су́дный обря́щу е, и бо́лшее дерзнове́ние име́ти хощу́ пред Бо́гом на́шим Иису́сом Христо́м. Сей у́бо по ча́стом прехожде́нии прии́де во Елла́ду, и пребы́сть во Афи́нех три дни, не возмо́же прия́ти от кого́ хле́ба. Ни ме́дницу же николи́же ноша́ше, ни влага́лище, ни милота́рь, ни и́но ничто́же сицево́е. Четве́ртому же дни прише́дшу зело́ взалка́ся, и став на высо́це ме́сте во гра́де, нача́т пла́кати ну́ждею и вопи́ти, му́жие афине́йстии помога́йте. Прите́кше же филосо́фи пе́рвии гра́да вопроша́ху его́, отку́ду еси́, и что есть е́же стра́ждеши. Он же рече́ им, ро́дом у́бо еги́птянин есмь. И отне́леже из оте́чества своего́ изыдо́х, в три должники́ впадо́х. И два у́бо оста́виста мя прие́мша долг, еди́н же не оставля́ет мя. Они́ же па́ки вопроша́ху его́, кто суть должницы́, и кто есть стужа́яй тебе́. Скажи́ нам его́ да помо́жем ти. Тогда́ рече́ им, смути́ мя от ю́ности сребролю́бие и блуд, и чре́вное неи́стовьство. И от двою́ у́бо изба́вихся, и ктому́ не смуща́ют мя. Чре́вное же неи́стовьство не мо́жет оста́вити мя. Четве́ртый у́бо име́я не я́дши день и не престае́т смуща́я мя, и прося́ обы́чное. Тогда́ не́цыи от филосо́ф мня́ще я́ко ле́стию глаго́лет, да́ша ему́ злати́цу, и после́доваша издале́ча ви́дети его́, что сотвори́ти и́мать. Он же взем тече́ поста́ви ю на хлебопрода́внице, и взем хлеб еди́н отъи́де, и ктому́ не яви́ся во град он. Тогда́ позна́ша филосо́фи, я́ко вои́стину доброде́телен есть. И да́вше хле́бу це́ну, взя́ша злати́цу свою́. Прише́д же в страны́ лакедемо́ньския, слы́ша о не́коем пе́рвом гра́жданине, манихе́йскую ве́ру сему́ держа́щу, доброде́тельну же житие́м су́щу, сему́ па́ки шед продаде́ себе́. И по двою́ ле́ту благода́тию Христо́вою отста́ви его́ от е́реси, и с жено́ю его́, и со всем до́мом его́, и приведе́ и́ к Це́ркви. Тогда́ возлюби́ша его́ ктому́, и не я́ко раба́, но я́ко при́сна отца́ имя́ху, и сла́вляху Бо́га.

Сей блаже́нный я́коже пове́дают не́цыи за́падных стран бя́ше, лати́нскаго язы́ка, земли́ же неме́цкия рожде́ние име́ и воспита́ние; от сла́вна и бога́та ро́да бе я́коже глаго́лют, от месте́рскаго. И возненави́дев богоме́рзую оте́ческую пре́лесть, ве́ру лати́нскую, возлюби́ же и́стинную на́шу христиа́нскую ве́ру правосла́вную. Посе́м утаи́вся всех, изы́де из дому́ своего́. И ма́ло отше́д, и от риз совлече́ся, и прие́м уро́дственое е́же Христа́ ра́ди бу́йственое житие́, я́коже мни́мо челове́ки. И та́ко от земли́ и от оте́чества своего́ отъи́де, и к восто́чным страна́м по́йде, взыска́ти дре́вле погубле́наго оте́чества. И мно́гу доса́ду блаже́ный и укоре́ние прие́м от безу́мных челове́к и бие́ние, и я́ко уро́д вменя́емь и́ми и безу́мен. И ве́лие терпе́ние показа́ от сту́дени зи́мния и от ва́ра со́лнечнаго, в день я́ко уро́д хожда́ше, в нощи́ же непреста́нно моли́тву к Бо́гу возсыла́ше. И пла́чася глаго́лаше в себе́: «О́ Иси́доре, мно́гими скорбьми́ подоба́ет ти вни́ти в Ца́рство небе́сное. Ну́жно бо есть, и ну́жницы восхища́ют Е́». И си́ми словесы́ утеша́яся блаже́нный, и та́ко от гра́да во град прехожда́ше, до́ндеже сла́внаго и многонаро́днаго града Росто́ва дости́же. И ту произволя́ет блаже́нный жи́тельствовати. Вси же мня́ху его́ я́ко уро́да, и ум погуби́вша, и мно́го досажде́ние и укоре́ние и ра́ны дая́ху ему́. Блаже́нный же я́ко в чужде́м телеси́ все со благодаре́нием терпя́ше, и ника́коже зла досади́телем воздава́ше. Но то́кмо во уме́ свое́м глаго́лаше к Бо́гу: «Го́споди, не поста́ви им во грех сего́». И никто́же ве́дяше доброде́тельнаго его́ жития́. Посе́м же блаже́нный устро́ив себе́ ку́щу в хвра́стии непокрове́ну, на ме́сте су́се во гра́де среди́ бла́тца не́коего поро́га, иде́же свято́е его́ те́ло и ны́не лежи́т. Да егда́ моли́тву твори́ти ему́, неви́димь бу́дет от челове́к. Си́цеже свято́му житие́ се су́етное преходя́щу, и сла́ву ми́ра сего́ нивочто́же вмени́. В день у́бо оскорбля́емь и уничижа́емь мно́гими озлобле́ньми. Но́щи же приходя́щи, а́бие святы́й в свою́ хвра́стную хи́жу прихожда́ше, и всю нощь без сна в моли́твах и в слеза́х пребыва́ше, и в коленопреклоне́нии. И па́ки в день уро́дство творя́ше. И от мно́гаго труда́ поко́й телеси́ своему́ приима́ше на у́лицах градски́х, на гно́ищах, или́ на сметии́, или́ в свое́й ку́щи те́ло свое́ на зе́млю помета́ше, и ту ма́ло сна приима́ше. Не име́яше бо у себе́ ничто́же в хи́жине свое́й, но то́кмо свое́ те́ло, и окру́г его́ хвра́стие, и то непокрове́но. И егда́ мра́зу или́ сне́гу или́ дождю́ быва́ющу, святы́й же те́ло и хи́жу непокрове́ну име́яше. И та́ко пребыва́ше во вся дни живота́ своего́. И ели́ко же блаже́нный Бо́га возлюби́, толи́ко и Бог того́ в сем ми́ре просла́ви. И во о́ном же Свое́м непреиду́щем и безконе́чнем небе́сном Ца́рствии, стори́цею благи́х пода́ст. Посе́м откры́ Бог свято́му о преставле́нии его́ из уз теле́сных разреше́ние. И от того́ вре́мене дово́льне в хи́же свое́й в моли́твах и в коленопоклоне́нии и в посте́ пребыва́ше, и сле́зы от о́чию я́ко бы́стрины испуща́я. Посе́м же возле́г, и ру́це крестообра́зно согну́в, и глаго́ла: «Го́споди Бо́же Вседержи́телю Иису́се Христе́ в ру́це Твои́ предаю́ дух мой». И та́ко со гла́сом вку́пе дух испусти́. Свята́я же его́ и непоро́чная душа́, святы́ми а́нгелы возноси́ма на небеса́. Блаже́нное же его́ те́ло оста́ на земли́, ве́рным подава́я и до сего́ дне исцеле́ния. Па́ки же по преставле́нии его́ свято́му те́лу его́ лежа́щу в хи́же его́, и се внеза́пу весь град обы́де благоуха́ние. И всем дивя́щымся и ужаса́ющымся о благоуха́нии, и глаго́лющым: «Ка́ко и отку́ду сие́ бысть?» - не ве́дяху бо свята́го преставле́ния. И се не́кий челове́к мимоходя́ хи́жу свята́го, и уве́де у́же к Бо́гу свята́го отше́дша. Честно́е же те́ло его́ на земли́ лежа́ше и благоуха́ние испуща́ше: и шед, возвести́ во гра́де всем лю́дем преставле́ние свята́го. Прише́дше же не́цыи богобоя́знивии лю́дие, и́же ве́ру иму́ще ко свято́му, погребо́ша честно́е его́ и трудолю́бное те́ло свята́го, и положи́ша е́ во гро́бе на том ме́сте иде́же преста́вися. И посе́м взе́мше благослове́ние у епи́скопа, и поста́виша над мощьми́ свята́го це́рковь, во и́мя Вознесе́ния Го́спода Бо́га и Спа́са на́шего Иису́са Христа́. Ему́же сла́ва, ны́не и при́сно и во ве́ки веко́в. Ами́нь.