По шестой песни:
И поется кондак и икос (или мученичен, аще несть).Стихи́:
Страстну́ю пучи́ну преплы́вши Пелаги́я,
И си сугу́бь пла́ванию, те́ло вда́вши огню́.
Сия́ бя́ше при Диоклитиа́не царе́, и слы́шавши е́же о Христо́ве ве́ре, и и́щуши уве́дети какова́ есть. И ви́де во сне епи́скопа креща́юща. Пущена́ же бы́вши е́же ити́ к пита́тельнице. Она́ же по́йде к епи́скопу, и́же и боже́ственым манове́нием прия́т, и крести́ ю́. Да я́ко услы́ша обру́чник ея́ сын царе́в, вся́кою стра́стию обло́жься, рачи́тельства и любве́ де́ля, сам себе́ уби́. Оте́ц же его́ Диоклитиа́н приведе́ к себе́ Пелаги́ю, и невозмо́г преложи́ти ю́ от ве́ры Христо́вы. И пото́м юне́ц ме́дян разже́г, и вонь святу́ю повеле́ воврещи́, иде́же ку́пно кончи́ну и вене́ц испове́данию восприя́т. Соверша́етжеся муче́ние ея́ и собра́ние об он пол близ свята́го му́ченика Ко́нона.
В то́йже день страсть свята́го му́ченика Селива́на епи́скопа Кеси́йскаго, и с ним четы́редесяти му́ченик
Стихи́:
Те́ло стру́нна Сильва́нова беловла́сия
Пова́пльшимся ста́ростию мече́м
Селива́н священному́ченик, бе от Га́зския страны́. Во́ин бе пе́рвие, последи́же Христа́ ра́ди оста́вль во́инство земна́го царя́, и во́инствова небе́сному Царю́ Христу́. Тем свяще́ния сподо́бися, презви́тером бысть, посе́м епи́скопом. В Христо́ве же пребыва́я Це́ркви, мно́ги уче́нием свои́м обрати́ в к Бо́гу. И ят бысть от идолослужи́тель, и приведе́н посреде́ собо́ра Кеси́йска, и бие́н бысть неща́дно. Посе́м пове́шен бысть и стро́ган. И па́ки ме́дяную руду́ осуже́н бысть копа́ти, в не́йже вельми́ утомле́н бысть. Христа́ же Бо́га испове́даше непреста́нно. Тем и со ины́ми четы́редесятию му́ченик науче́ными от него́, мече́м главы́ их усеко́ша.
В то́йже день страсть свята́го му́ченика Альвиа́на епи́скопа, и учени́к его́
Стихи́:
На нетле́нное бога́тство Альвиа́н упова́я,
Твоея́ ра́ди любве́ бысть всесожже́ние, Сло́ве:
Альвиа́на умори́ пла́менный огнь в четве́ртый день.
Алвиа́н боже́ственный священному́ченик, бе при Максимиа́не царе́, облада́ющу А́сиею Елиа́ну. Агрипи́ну же не́коему жерцу́ су́щу и́дольскому тре́бы творя́щу и́долом, тогда́ ят бысть Алвиа́н, и ну́димь пожре́ти и́долом, и лива́н положи́ти на тре́бищи. Он же проти́ву благочести́выми отвеща́ словесы́, Христо́ву у́бо ве́ру хвалю́, а и́дольскую слу́жбу укаря́ю. Того́ ра́ди пе́рвее у́бо рожны́ желе́зными чре́во и ля́двия его́ поджго́ша. Посе́м же́злием бие́н бысть неща́дно, и та́ко пону́жден бысть отврещи́ся Христа́ и пожре́ти и́долом, и не повину́ся со ученико́м свои́м. И последи́ огне́м осуже́ние прия́т. Разже́не же бы́вши пещи́, и с тем вве́ржен в ню сконча́ся.
В то́йже день па́мять преподо́бного отца́ на́шего Ила́рия чудотво́рца
Стихи́:
Позна́х Ила́рия ти́ха естество́м,
И́же чудоде́йствует, поне́ а́ще во гробе лежа́.
В то́йже день преподо́бнаго отца́ на́шего Ники́фора игу́мена Мидики́йския оби́тели
Стихи́:
Доброде́тели боже́ственаго восприя́ти венца́,
Боже́ственый от жития́ Ники́фор.
В то́йже день па́мять святы́х му́ченик Афроди́сия, Афроди́сия, Лео́нтия, Мида́ла, Анто́ния, Уалериа́на, Макро́вия, и и́же с ни́ми мно́жество, в Скифопо́ли му́ченых.
Стихи́:
Что сие́, и́же ши́ю простре́ к мечу́?
Афроди́сие, Афроди́сию рече́.
Лео́нтие о́ба страда́льца Иа́кова и су́ще,
Потекоша к мечу́
И́же о глава́х отъе́мшимся обои́м му́чеником,
Страда́льчески водружи́ огнь самого́ кро́ва.
Соверша́етжеся собра́ние их в пречестне́м апо́стольстве свята́го и всехва́льнаго апо́стола Иа́кова бр́ата Госпо́дня, су́щему внутрь це́ркви Пресвяты́я Влады́чицы на́шея Богоро́дицы и при́сно Де́вы Мари́и, в Халкопрат́ии.
В то́йже день воспомина́ние пренесе́ния моще́м свята́го и дру́га Бо́жия Ла́заря и Мари́и Магдалы́ни, бы́вши мироно́сицы при Льве христолюби́вем цари́, и́мени ра́ди свята́го. Спра́зднуется и обновле́ния в такове́й оби́тели це́ркви Святы́я Богоро́дицы.
Стихи́:
Магдалы́ни ты ме́ртва жива́ еси́,
И а́ще молчи́ши что бо́лее и́маши,
Кто ужасти́т тебе́, я́коже дре́вле Мари́ю?
Глаго́лет Раввуни́ Мари́я Христу́,
Па́ки глаго́лет Христо́с: Спогре́бшаго тя град сохраня́й.
В то́йже день страсть свята́го му́ченика Ера́зма
Ера́зм блаже́нный, измла́да Христа́ возлюби́в и за́поведи Его́ храня́. И поста́влен бысть епи́скопом во гра́де Фермиа́се. Нечести́вый же царь Диоклитиа́н, смяте́ гра́ды му́ча христиа́ны. Святы́й же Ера́зм оста́вль престо́л, и бежа́ в го́ру Лива́н, и пребы́сть седмь лет кры́яся. И бысть ему́ с небесе́ глас а́нгельский: «О́ Ера́зме, никто́ же спя победи́т враги́. Иди́ во град свой, и до́бре подвиза́йся, и прии́меши вене́ц». Иду́щу же ему́, усрето́ша его́ во́ини, и вопроси́ша его́: «Ко́его бо́га чте́ши?». Ера́зм же христиа́на себе́ испове́да. Тогда́ е́мше и́, приведо́ша его́ во Антиохи́ю к Диоклитиа́ну. И вопроше́н быв, и христиа́на себе́ испове́да. И повеле́ царь би́ти его́ же́злием. Святы́й же укори́ его́. Посе́м повеле́ би́ти его́ шелы́гами оловя́ными. И я́ко не покори́ся, скобелми́ желе́зными острога́ша все те́ло его́. Посе́м развари́ша смолу́ и се́ру, и возлия́ша на те́ло свята́го, и ника́коже прикосну́ся ему́. Мучи́тель же повеле́ его́ воврещи́ в темни́цу обложи́в желе́зы тя́жкими. А́нгел же Госпо́день отве́рзе ему́ темни́цу, и разреши́ свята́го, и рече́ ему́: «Восле́дуй ми, да веду́ тя во Иттали́ю, да и та́мо мно́ги спасе́ши». И приве́д его́ во град Лики́й, и оста́ви его́ ту. И уча́ вся крести́тися, и чудеса́ творя́ше вели́ка. Воскреси́ же ту сы́на Анаста́сиева му́жа сла́вна. И крести́шася от него́ де́сять ты́сящь люде́й. И слы́ша о нем Максимиа́н, посла́в приведе́ его́ во Иттали́ю, и повеле́ би́ти его́ по лани́тома, и преща́ше ему́ распя́тием, а́ще не пожре́т бого́м. И рече́ Ера́зм: «Где суть бо́ги твои́, да пожру́ им?». И ведо́ша его́ во храм Ди́ев. Святы́й же моли́твою сокруши́ вся и́долы. И изы́де из ка́пища огнь и попаля́я неве́рныя. И бежа́ от гра́да Максимия́н. И мно́ги крести́в ту святы́й, и отъи́де во град Фирми́йский. И та́мо ят его́ Максимиа́н, и повеле́ его́ облещи́ во броня́ ме́дяны, и посади́ти его́ на одре́ разже́не. И пригвозди́ша но́ги его́ к земли́, и окладо́ша дро́вы его́ до верха́, и заже́гше дрова́, и возлива́ху смолу́ и ма́сло, и разгоре́шася дрова́ и изгоре́ша. Святы́й же неврежде́н бысть. И убоя́ся Максимиа́н люде́й, бежа́ в пола́ту. А́нгел же Госпо́день пое́м Ера́зма, и приведе́ его́ во град Фермиа́н. И моли́тву сотвори́ за вся, предаде́ ду́шу свою́ в ру́це Бо́жии. И погребе́н бысть че́стно правове́рными.
В то́йже день сло́во от патерика́ о Висарио́не, ка́ко сло́вом изгоня́ше бе́сы
Прии́де иногда́ еди́н бесну́яйся в скит, и бысть у́бо о нем в це́ ркви моли́ тва к Бо́ гу, и не изы́ де из него́ де́ мон, бе бо же́ сток. И глаго́лаху кли́рицы, что мо́жем сотвори́ти де́мону сему́, никто́ же бо его́ мо́жет изгони́ти, то́кмо а́вва Висарио́н, а́ще умо́лим и́ о нем, ни в це́рковь и́мать приити́. Оба́че сотвори́м се, да прии́дет зау́тра преди́ всех в це́рковь, да сотвори́м бесну́ющагося се́сти на ме́сте его́. И егда́ прии́дет и ста́нет на моли́тве, и рече́м ему́, возбуди́ бра́та о́тче. Сотвори́ша же та́ко. Прише́ дшу же за у́ тра ста́рцу, и ста́вшу на моли́тве. И глаго́лаша возбуди́ бра́та о́тче. И рече́ ему́ Висарио́н, воста́ни и иди́ вон. И а́бие изы́де из него́ де́мон. И от того́ часа́ исцеле́.
Бо́гу на́шему сла́ва, ны́не и при́сно и во ве́ки веко́в .