Стихи́:

Ду́ше окамене́ный, устране́ный Бо́жия стра́ха,

Ка́мением поби́ша боже́ственаго Иереми́ю:

В пе́рвый маия ка́мением поби́ша Иереми́ю.

Иереми́я бе от Анафо́фа. И погребе́н бысть во Еги́пте, ка́мением побие́н быв от жи́дов. Лежи́т же на ме́сте селе́ния фарао́нова, я́ко еги́птяне просла́виша и́, благоде́тель прии́мше им. Помоли́бося, и губя́щыя их а́спиды умро́ша, и водни́и зве́рие, я́же нари́чут еги́птяне фоть (ефо́фь), а гре́цы крокоди́лы. И ели́ко ве́рнии Бо́жии, до дне́шняго дне мо́лятся на ме́сте том, и взима́ют от пе́рсти ме́ста того́, и уяде́ние а́спид целя́т. Мно́зи же у́бо и са́ми зве́ри водны́я прого́нят. Мы же у́бо сия́ слы́шахом вои́стину от раб Антиго́нь , и Птоломе́овых, ста́рым муже́м су́щем, я́ко у́бо ре́кше Алекса́ндр Македо́нский царь прише́д на ме́сто гро́ба проро́ча, и разуме́в быва́ющыя та́йны во Александри́ю пренесе́ мо́щи его́, и сла́вну сотво́рь честь тем. И поги́бе от земли́ тоя́ весь род а́спидеск, та́коже и от рек крокоди́ли.

Проро́чествова же Иереми́я о стра́сти Христо́ве си́це глаго́ля: «Прииде́те вложи́м дре́во в хлеб его́, и истреби́м его́ от земли́ живу́щих, и и́мя его́ да не помяне́тся ктому́». Се́йже у́бо Иереми́я проро́к зна́мение даде́ жерце́м еги́петским, я́ко подоба́ет стрясти́ся и́долом их и па́сти, спасе́наго ра́ди Отроча́те ро́ждьшагося от Де́вы в я́слех. И того́ ра́ди да́же и досе́ле боготворя́т па́мять девстворо́дия, и младе́нца в я́слех поло́жше поклоня́ются волхвы́, я́коже и Птоломе́ю царю́ вопроша́ющу всегда́: «Что ра́ди сие́?». И глаго́лаху ему́ волхвы́: «Я́ко преда́ние се есть дано́, и та́йна вели́ка, святы́м му́жем проро́ком ко отце́м на́шим, и ждем кончи́ны та́йне сей».

Сей проро́к Иереми́я пре́жде запусте́ния церко́внаго, взя ковче́г зако́на, и су́щая в нем, и сотвори́ вложи́ти я́ в ка́мык, и рече́ предстоя́щим: «Отъи́де Госпо́дь от Сио́на на не́бо, и па́ки прии́дет зако́нник в Сио́н. И зна́мение бу́ди вам прише́ствия его́ егда́ дре́ву вся стра́ны покло́нятся». Рече́ же, я́ко ковче́га сего́ никто́же и́мать изнести́, то́чию Ааро́н: и ка́меня и дщиц, и су́щих в нею́, никто́же и́мать разгну́ти, ни от жрец ни от проро́к, но то́чию Моисе́й избра́нник Бо́жий. И в день же воскресе́ния, пе́рвое ковче́г воста́нет и изы́дет из ка́мене, и положе́н бу́дет на горе́ Сио́нстей, и вси святи́и соберу́тся к нему́, жду́ще ту Го́спода, от врага́ бежа́ще хотя́щего уби́ти я́. Ка́мык же он запечатле́ пе́рстнем и́мене Бо́жия. И бысть мес́то я́коже извая́ние желе́зно. И о́блак све́тел покры́ и́мя то. И никто́ же мо́жет ви́дети ме́ста того́ и почести́ до дне́шняго дне и до кончи́ны. Есть же ка́мык в пусты́ни, иде́же пе́рвое ковче́г сотворе́н бысть, посреде́ обою́ го́ру, в не́юже лежи́та Моисе́й и Ааро́н. И но́щию о́блак а́ки огне́н быва́ет на ме́сте том, по о́бразу пе́рвому, я́ко не и́мать преста́ти сла́ва Бо́жия от зако́на своего́. Се́го де́ля даде́ Бог Иереми́и благода́ть, да кончи́ну та́йны его́ сотвори́т, да бу́дет соо́бщник Моисе́ю и Ааро́ну. И вку́пе суть до дне́шняго дне, поне́же Иереми́я от се́мене свяще́ннаго есть.

Стихи́:

И Ва́те отсе́чене главе́ мече́м,

Подо́бну су́щу небе́сным село́м.

Святы́й му́ченик Ва́та бе от страны́ Пе́рския, от пра́дед Христо́вы ве́ры научи́ся. И быв лет три́десяти, оста́ви отца́ и ма́терь, жену́ же и ча́да, и бога́тьство свое́ ни́щим разда́, и отше́д и бысть мних, и до́бре постя́ся. И восхоте́ муче́ниемь сконча́тися. Подви́гшужеся гоне́нию на христия́ны. И всем мни́хом из монасты́ря бежа́вшим, и сей еди́н оста́. И ят бысть, и пре́дан кня́зю нисиви́йскому. И тем пону́жен бысть отврещи́ся Христа́, и поклони́тися со́лнцу и огню́. И не повину́вся, но со дерзнове́нием испове́да Христа́. Того́ ра́ди за о́бе ру́це привя́зан бысть, и от мно́гия ну́жи исторго́шася ему́ плещи́. Посе́м привя́зан бысть за та́йныя у́ды, и влачи́мь и бие́мь по всему́ те́лу. Посе́м мече́м сконча́ся за ве́ру Христо́ву.

Стихи́:

От земли́ прелете́ к небесным пче́лином,

Пчела́ бысть благи́х действ Исидо́ра.

Стихи́:

Принесе́ плод зрел смоквина ветвь,

За ру́це св́язан и пове́шен Са́вва.

Бра́та два идо́ста на торг продая́ти рукоде́лие свое́. И я́ко отъи́де еди́н, други́й же впаде́ в любодея́ние. Прише́д же брат рече́ ему́, по́йдема бра́те в ке́лию. Он же рече́, нейду́. Се́йже рече́, почто́ бра́те. Он же рече́, отше́дшу тебе́, впадо́хся в любодея́ние. Брат же моля́ше и́ глаго́ля, что ти есть. Он же рече́, у́же ти рех, я́ко впадо́х в любодея́ние. Хотя́ше же его́ брат возврати́ти, глаго́ла ему́, аз егда́ отъидо́х от тебе́, то́же ми бысть. Но шед пока́емася приле́жно, и отда́ст на́ма Бог. И та́ко брат умили́ся, прии́де в страх Бо́жий, и и́де на свое́ ме́сто. И прише́дша пове́даста ста́рцем приключи́вшееся и́ма, и да́ша и́ма за́поведь. Еди́н же по дру́зе ка́яся я́ко сам согреши́. Ви́дев же Бог труд любве́ его́, и за ма́ло дней яви́ Бог е́теру ста́рцу, я́ко за мно́гую любо́вь не согреши́вшаго бра́та отдано́ бысть согре́шьшему. Се у́бо есть и́стина положи́ти ду́шу свою́ по бра́те свое́м.

Си́це глаго́лет Госпо́дь: Се дах пред очи́ма ва́шима путь жи́зни, и путь поги́бели, во́ньже восхо́щете и по́йдете. Позна́йте се́ти дия́воли, и дале́че от них ходи́те. Вся́кия вдовы́ и сироты́ не озлобля́йте. А́ще ли непра́вдою озло́бите, и воздыха́юще возопию́т ти́и ко Мне, услы́шу я́, и разгне́ваюся я́ростию на вы, и погублю́ вы мече́м, и бу́дут жены́ ва́шы вдо́вы, и ча́да ва́шы си́ры. Но бу́дите сирота́м я́ко отцы́, и вдови́цам я́ко му́жи, да тем вни́дете в путь ве́чныя жи́зни в Ца́рство небе́сное, си́це рече́ Госпо́дь: и вы послу́шайте мене́, е́же пода́ти проще́ние кому́ждо бра́ту своему́ и бли́жнему своему́.

Сей у́бо при́сно помина́емый оте́ц нашь Пафно́тий, бя́ше от коле́на ага́ряньска влеки́йся ро́дом. Па́ки же попуще́нием Бо́жиим за грехи́ на́ша, прии́де на ру́сскую зе́млю царь Баты́й безбо́жный, и гра́ды пленя́я и пожига́я. И хра́мы освяще́нныя со все́ю святы́нею и благоле́пием украше́ныя потребля́я. И правосла́вия держа́тели я́ко кла́сы пожина́я, и владу́щих мече́м посека́я. И па́ки в тех ме́сто поставля́я свои́х вла́стелей от безбо́жных ага́рян, и́же зову́тся полове́цким язы́ком баска́ки; И от тех у́бо коле́на и ро́да блаже́нный Пафно́тий. Сия́ же вся соде́яв безбо́жный то царь, отъи́де во ины́я страны́, и та́мо убие́н бысть, и зле окая́нную свою́ ду́шу изве́рже. И па́ки у́бо ру́сстии сы́нове от належа́щаго стра́ха ва́рварска облегче́ние прия́ша. Ки́йждо от благоро́дных властодержа́тель дре́внее свое́ оте́чество восприима́ху. И повсю́ду всем по свои́м собра́вшимся. И бя́ху мно́жахуся во всех граде́х правосла́вия догма́ты держа́щии. И повелева́ху, а́ще у́бо не благочести́вии ага́рянскаго безбо́жия нача́лницы не присту́пят к Христо́ве ве́ре благоче́стия, сих сме́рти предава́ти. От ни́хже еди́н бе дед блаже́ннаго Пафно́тия, и той крести́ся, и нарече́н бысть Марти́н. Посе́м от того́ Марти́на роди́ся сын, и́менем Иоа́нн оте́ц свята́го Пафно́тия. Ма́ти же свята́го и́менем Фоти́ния. И обе́ма соблюда́ющима за́поведи Бо́жия во всем. В селце́ же живу́щима и́ма во о́тчи насле́дии, нарица́емо Куди́ново, от оте́чества Бо́ровска три по́прища, от нею́ же возрасте́ блаже́нный сей, и навы́че боже́ственое писа́ние. О пусто́шных же ни ма́ло бреги́й. И посе́м оста́ви роди́теля своя́, и вся я́же в ми́ре, и отше́д в монасты́рь того́же гра́да Бо́ровска, к Покро́ву пречи́стыя Богоро́дицы, и́же зове́тся Высо́кое, и та́мо прия́ и́ноческий о́браз. И в ме́сто Парфе́ния Пафно́тий именова́ся. И до́бре вся слу́жбы монасты́рьския проше́д, со вся́ким благочи́нием. И все́ми люби́мь бе и почита́емь за премно́гую его́ доброде́тель. И всех соверши́ лет в по́двизе два́десять. Посе́м же па́стырь оби́тели тоя́ отъи́де ко Го́споду. Блаже́нный же избра́нием и моле́нием от су́щих та́мо и́нок, па́чеже зело́ моли́мь и принужа́емь от владу́щаго град его́же бе оби́тель во оби́тели бы́ти игу́меном. Святи́тельствующу же в то вре́мя Фоти́ю митрополи́ту, и рукоположе́нием того́ святы́й нача́льству каса́ется. И посе́м поста́влен бысть игу́меном в ту же оби́тель иде́же постриже́ся. И посе́м преподо́бный болма́ простре́ся к подвиго́м, и о па́стве прилежа́ше до́бре, пасы́й Христо́во ста́до слове́сных ове́ц лет 13. И посе́м впаде́ в неду́г теле́сный, и на до́лзе боле́зни протя́гшися, и свяще́нную схи́му возложи́ на ся. И отто́ле не литургиса́ше и до отше́ствия своего́ я́же к Бо́гу. И па́ки устраби́вся от боле́зни, и оста́ви па́ству свою́. И посе́м отъи́де святы́й от того́ ме́ста два по́прища в подо́лие. И обре́те ме́сто уго́дно ме́жду двема́ река́ма, и ту всели́ся со еди́ным бра́том. Бе же ме́сто то ины́я о́бласти тогда́. Посе́м же ко свято́му приидо́ша мно́зи бра́тия, святы́й же всех с ра́достию приима́ше. И па́ки святы́й по проше́нию бра́тии возгради́ им це́рковь, во и́мя Пречи́стыя Богоро́дицы, честна́го Ея́ Рождества́, и освящена́ бысть повеле́нием святе́йшаго митрополи́та Ио́ны. И мно́зи челове́цы па́кости творя́ще свято́му мно́гащи наваже́нием дия́волим. И та́ко поживе́ преподо́бный Пафно́тий до́бре, и боголюбе́зне, и все оби́тели во устрое́ние устро́ив, поне́же и ме́сто то потре́бно зело́, и ча́стостию леса остенено́. И мно́га чудеса́ сотвори́ в сла́ву Христо́ву святы́й. И в ста́рости глубо́це в неду́г впаде́ теле́сный, по всеми́рнем пра́зднице Па́схи Воскресе́ния Христо́ва, в четверто́к тре́тия неде́ли. И пребы́сть боля́ до четвертка́ же четве́ртыя неде́ли, и ученики́ свои́ми подкрепля́емь, на церко́вное пра́вило хожда́ше, и в тех днех. Посе́м же воспроси́ свята́го пе́рвый учени́к его́ Иноке́нтий глаго́ля, о́тче Пафно́тие, а́ще ты преста́вишися, да прии́дет ли се́мо протопо́п, и от ине́х свяще́нник из гра́да. Святы́й же отвеща́ ему́ глаго́ля, сим бо мно́гим мяте́жь хо́щете сотвори́ти. Но да никто́же не уве́сть, ни во граде́х ни в се́лех, доне́леже мя погребе́те в зе́млю свои́ми иере́и. И посе́м причасти́вся боже́ственых Та́ин те́ла и кро́ве Го́спода на́шего Иису́са Христа́. И посе́м повеле́ гроб ископа́ти себе́ от ю́жныя страны́ близ двере́й церко́вных. И егда́ приспе́ час вече́рний, тогда́ нача́ святы́й стихи́ пе́ти поко́йны. По сих, ру́це Твои́ сотвори́сте мя, та́же и про́чыя псалмы́. Очи́ма же бы́стро взира́я се́мо и о́вамо. И посе́м нача́ пе́ти стихи́ святы́х лик, и про́чая. И па́ки нача́ моли́ти всеми́лостиваго Бо́га и пречи́стую Богоро́дицу о спасе́нии души́ своея́. Пото́м нача́т отвраща́тися от ле́выя страны́ на де́сно. Ученицы́ же мно́гащи обрати́ша его́, он же па́ки обраща́шеся на де́сно, шепча́ не́кая словеса́. Ученико́м же зря́щим. Блаже́нный же опря́тався опа́сне, и ру́це крестообра́зне положи́в на пе́рсех, и та́ко предаде́ честну́ю свою́ ду́шу в ру́це Го́сподеви. Ему́же сла́ва, ны́не и при́сно и во ве́ки веко́в.