По шестой песни:
И поется кондак и икос (или мученичен, аще несть).Стихи́:
Сугу́бныя, у́мер, обре́те Иа́ков венца́,
Я́ко облада́в и страстьми́, и бе́совы.
Иа́ков преподо́бный оте́ц наш от ю́ны версты́ по́стное возлюби́в житие́, и быв мона́х, посто́м и бде́ние и злострада́нием себе́ ну́ждаше. Прилежа́ше же боже́ственных книг писа́нию: очи́стив ум свой пе́рвее. По сих епи́скопскаго са́на сподо́бися. В ле́та же иконобо́рец, ну́димь бе отврещи́ся честны́х ико́н поклоне́ния. И не покори́вся, мно́ги напа́сти претерпе́, гоне́ния же и заточе́ния, и неисповеди́мыя беды́, глад, и жа́жду, и и́на мно́га, я́же на него́ злочести́вии помышля́ху. В тех у́бо разли́чных му́ках, и в лю́тых томле́ниих блаже́нную свою́ ду́шу предаде́ в ру́це Бо́жии, Его́же ра́ди до сме́рти подвиза́ся. И от Него́ прия́т Ца́рство небе́сное, во ве́ки ра́дуяся.
В то́йже день па́мять и́же во святы́х отца́ на́шего Кири́лла епи́скопа Ката́нскаго
Стихи́:
Сугу́бныя у́мер, обре́те венцы́ Кири́лл,
Я́ко облада́в страстьми́ и бе́совы.
Той бя́ше от Антиохи́и ро́дом. Быв учени́к свята́го апо́стола Петр, и от него́ поста́влен бысть епи́скопом Ката́нский Сикели́и. До́бре же и боголюбе́зне упасе́ паству свою́, и неве́рныя к ве́ре Христо́ве приведе́, и чудеса́ мно́га соде́лав: от ни́хже у́бо еди́но воспомя́нем. Бя́ше у́бо исто́чник во о́ном ме́сте, го́рьку име́я во́ду. Сей же Бо́гу помоли́вся, преложи́ горчи́ну в сла́дость. Се же ви́дев е́ллинский нача́льник [некоторый] идолослужи́тель, ве́рова Христу́. И с ним и ини́и мно́зи. Посе́м во глубину́ ста́рости доше́д, и святоле́пным сном почи́. И положе́н бысть в том о́строве че́стно, цельбы́ подава́я, и́же к нему́ с ве́рою притека́ющым и до сего́ дне.
В то́йже день па́мять и́же во святы́х отца́ на́шего Фомы́, патриа́рха Константи́ня гра́да
Стихи́:
Жизнь Фома́ оста́вив чи́сленую,
Живота́ [при]обре́те безчи́сленаго.
Сей и́же во святы́х оте́ц наш Фома́, премно́гия ра́ди доброде́тели, и соверше́наго ра́зума, и благоче́стия, диа́кон Вели́кия це́ркве поста́влен быв. И сакелла́рий учинен бысть преподо́бным отце́м на́шым, и́же в чудесе́х вели́ким Иоа́нном по́стником, в ца́рство при́сно помина́емаго Маврики́я. И по сме́рти Иоа́ннове, и е́же по нем святи́тельствовавша Кириа́ка, поста́влен бысть патриа́рх Константи́ня гра́да. И упра́вив престо́л три ле́та, и два ме́сяца. И мно́го на еретики́ подвиза́ся. И правосла́вная уче́ния содержа́в, и па́ству до́бре и богоуго́дне упа́с, с ми́ром у́спе.
В то́йже день па́мять жене́ излия́вшей ми́ро на главу́ Христо́ву в дому́ Си́мона прокаже́ннаго
Стихи́:
Жена́ возлия́вши на Те́ло Госпо́дне ми́ро,
Никоди́мово пома́зание предвари́вши,
Е́же сми́рну с ало́ем.
В то́йже день святы́х му́чеников Филимо́на и До́мна
Филимо́н и До́мен Христо́ва му́ченика бе́ста от Ри́ма во вре́мя гоне́ния ше́дша в страну́ тали́йскую Христа́ пропове́даста, мно́гы от неве́рных от ле́сти и́дольския уче́нием свои́м обрати́ста к ве́ре Христа́ Бо́га на́шего. И креща́ху сего́ ра́ди подвиго́ста на гнев идолослужи́теля. И я́та бы́ста связа́вше и преда́ша страны́ тоя́ кня́зю. Князь же ви́дев честны́я му́жа су́ща и пе́рвое ласка́нием покуша́шеся отлучи́ста ве́ры Христо́вы и обеща́ им да́ры мно́гы и че́сти досто́йны. Ви́дев же ничто́же па́че Христа́ лю́бяще еди́ного Бо́га призыва́ющи и пропове́дающи, и обнажи́в их и разпростре́ по земли́ и би́ша неща́дно понужа́ющи их пожре́ти и́долом. Я́ко не увеща́ша их, и затвори́ их в темни́цу, и па́ки изведе́ и пону́ди отврещи́ся Христа́ и не увеща́в и усекну́в их мече́м.