На паремиях вечерни по прокимне:
Быт.1:1–13
1 Въ нача́лѣ сотворѝ бг҃ъ не́бо и҆ зе́млю. 2 Землѧ́ же бѣ̀ неви́дима и҆ неꙋстро́ена, и҆ тьма̀ верхꙋ̀ бе́здны, и҆ дх҃ъ бж҃їй ноша́шесѧ верхꙋ̀ воды̀. 3 И҆ речѐ бг҃ъ: да бꙋ́детъ свѣ́тъ. И҆ бы́сть свѣ́тъ. 4 И҆ ви́дѣ бг҃ъ свѣ́тъ, ꙗ҆́кѡ добро̀, и҆ разлꙋчѝ бг҃ъ междꙋ̀ свѣ́томъ и҆ междꙋ̀ тьмо́ю. 5 И҆ наречѐ бг҃ъ свѣ́тъ де́нь, а҆ тьмꙋ̀ наречѐ но́щь. И҆ бы́сть ве́черъ, и҆ бы́сть ᲂу҆́тро, де́нь є҆ди́нъ. 6 И҆ речѐ бг҃ъ: да бꙋ́детъ тве́рдь посредѣ̀ воды̀, и҆ да бꙋ́детъ разлꙋча́ющи посредѣ̀ воды̀ и҆ воды̀. И҆ бы́сть та́кѡ. 7 И҆ сотворѝ бг҃ъ тве́рдь, и҆ разлꙋчѝ бг҃ъ междꙋ̀ водо́ю, ꙗ҆́же бѣ̀ под̾ тве́рдїю, и҆ междꙋ̀ водо́ю, ꙗ҆́же бѣ̀ над̾ тве́рдїю. 8 И҆ наречѐ бг҃ъ тве́рдь не́бо. И҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь вторы́й. 9 И҆ речѐ бг҃ъ: да собере́тсѧ вода̀, ꙗ҆́же под̾ небесе́мъ, въ собра́нїе є҆ди́но, и҆ да ꙗ҆ви́тсѧ сꙋ́ша. И҆ бы́сть та́кѡ. И҆ собра́сѧ вода̀, ꙗ҆́же под̾ небесе́мъ, въ собра̑нїѧ своѧ̑, и҆ ꙗ҆ви́сѧ сꙋ́ша. 10 И҆ наречѐ бг҃ъ сꙋ́шꙋ зе́млю, и҆ собра̑нїѧ во́дъ наречѐ морѧ̀. И҆ ви́дѣ бг҃ъ, ꙗ҆́кѡ добро̀. 11 И҆ речѐ бг҃ъ: да прорасти́тъ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ бы́сть та́кѡ. 12 И҆ и҆знесѐ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ ви́дѣ бг҃ъ, ꙗ҆́кѡ добро̀. 13 И҆ бы́сть ве́черъ, и҆ бы́сть ᲂу҆́тро, де́нь тре́тїй.
Исх.14:15–18, 21–23, 27–29
15 И҆ речѐ гдⷭ҇ь къ мѡѷсе́ю: что̀ вопїе́ши ко мнѣ̀; рцы̀ сынѡ́мъ і҆и҃лєвымъ, и҆ да пꙋтеше́ствꙋютъ, 16 ты́ же возмѝ же́злъ тво́й и҆ прострѝ рꙋ́кꙋ твою̀ на мо́ре, и҆ расто́ргни є҆̀: и҆ да вни́дꙋтъ сы́нове і҆и҃лєвы посредѣ̀ мо́рѧ по сꙋ́хꙋ: 17 и҆ сѐ, а҆́зъ ѡ҆жесточꙋ̀ се́рдце фараѡ́ново и҆ всѣ́хъ є҆гѵ́птѧнъ, и҆ вни́дꙋтъ в̾слѣ́дъ и҆́хъ: и҆ просла́влюсѧ въ фараѡ́нѣ и҆ во все́мъ во́инствѣ є҆гѡ̀, и҆ въ колесни́цахъ и҆ въ ко́нехъ є҆гѡ̀, 18 и҆ ᲂу҆вѣ́дѧтъ всѝ є҆гѵ́птѧне, ꙗ҆́кѡ а҆́зъ є҆́смь гдⷭ҇ь, є҆гда̀ прославлѧ́юсѧ въ фараѡ́нѣ и҆ въ колесни́цахъ и҆ въ ко́нехъ є҆гѡ̀. 21 Простре́ же мѡѷсе́й рꙋ́кꙋ на мо́ре, и҆ возгна̀ гдⷭ҇ь мо́ре вѣ́тромъ ю҆́жнымъ си́льнымъ всю̀ но́щь, и҆ сотворѝ мо́ре сꙋ́шꙋ, и҆ разстꙋпи́сѧ вода̀. 22 И҆ внидо́ша сы́нове і҆и҃лєвы посредѣ̀ мо́рѧ по сꙋ́хꙋ, и҆ вода̀ и҆̀мъ стѣна̀ бы́сть ѡ҆деснꙋ́ю и҆ стѣна̀ ѡ҆шꙋ́юю. 23 Погна́ша же є҆гѵ́птѧне и҆ внидо́ша в̾слѣ́дъ и҆́хъ, и҆ всѧ́къ ко́нь фараѡ́новъ, и҆ колєсни́цы, и҆ вса́дники посредѣ̀ мо́рѧ. 27 Простре́ же мѡѷсе́й рꙋ́кꙋ на мо́ре, и҆ ᲂу҆стро́исѧ вода̀ ко дню̀ на мѣ́сто: є҆гѵ́птѧне же бѣжа́ша под̾ водо́ю, и҆ и҆стрѧсѐ гдⷭ҇ь є҆гѵ́птѧны посредѣ̀ мо́рѧ: 28 и҆ ѡ҆брати́вшисѧ вода̀ покры̀ колєсни́цы и҆ вса́дники и҆ всю̀ си́лꙋ фараѡ́новꙋ, вше́дши в̾слѣ́дъ и҆́хъ въ мо́ре: и҆ не ѡ҆ста̀ ѿ ни́хъ ни є҆ди́нъ. 29 Сы́нове же і҆и҃лєвы проидо́ша по сꙋ́хꙋ посредѣ̀ мо́рѧ: вода́ же и҆̀мъ стѣна̀ (бы́сть) ѡ҆деснꙋ́ю и҆ стѣна̀ ѡ҆шꙋ́юю,
Исх.15:22–27
22 Поѧ́тъ же мѡѷсе́й сы́ны і҆и҃лєвы ѿ мо́рѧ чермна́гѡ и҆ ведѐ и҆̀хъ въ пꙋсты́ню сꙋ́ръ: и҆ и҆дѧ́хꙋ трѝ дни̑ въ пꙋсты́ни, и҆ не ѡ҆брѣта́хꙋ воды̀ пи́ти. 23 Прїидо́ша же въ ме́ррꙋ, и҆ не можа́хꙋ пи́ти воды̀ ѿ ме́рры, горька́ бо бѣ̀: сегѡ̀ ра́ди нарече́сѧ и҆́мѧ мѣ́стꙋ томꙋ̀ го́ресть. 24 И҆ ропта́хꙋ лю́дїе на мѡѷсе́а, глаго́люще: что̀ пїе́мъ; 25 Возопи́ же мѡѷсе́й ко гдⷭ҇ꙋ, и҆ показа̀ є҆мꙋ̀ гдⷭ҇ь дре́во, и҆ вложѝ є҆̀ въ во́дꙋ, и҆ ᲂу҆слади́сѧ вода̀: та́мѡ положѝ є҆мꙋ̀ ѡ҆правда̑нїѧ и҆ сꙋдьбы̑, и҆ та́мѡ є҆го̀ и҆скꙋсѝ, 26 и҆ речѐ: а҆́ще слꙋ́хомъ ᲂу҆слы́шиши гла́съ гдⷭ҇а бг҃а твоегѡ̀, и҆ ᲂу҆гѡ́днаѧ пред̾ ни́мъ сотвори́ши, и҆ внꙋши́ши за́повѣдемъ є҆гѡ̀, и҆ сохрани́ши всѧ̑ ѡ҆правда̑нїѧ є҆гѡ̀: всѧ́кꙋ болѣ́знь, ю҆́же наведо́хъ є҆гѵ́птѧнѡмъ, не наведꙋ̀ на тѧ̀: а҆́зъ бо є҆́смь гдⷭ҇ь бг҃ъ тво́й и҆сцѣлѧ́ѧй тѧ̀. 27 И҆ прїидо́ша во є҆лі́мъ, и҆ бѧ́хꙋ та́мѡ двана́десѧть и҆сто́чникѡвъ во́дъ, и҆ се́дмьдесѧтъ сте́блїй фі́нїковыхъ: и҆ ѡ҆полчи́шасѧ та́мѡ при вода́хъ.
Исх.16:1
1 Воздвиго́шасѧ же ѿ є҆лі́ма, и҆ прїи́де ве́сь со́нмъ сынѡ́въ і҆и҃левыхъ въ пꙋсты́ню сі́нъ, ꙗ҆́же є҆́сть междꙋ̀ є҆лі́момъ и҆ междꙋ̀ сі́ною. Въ пѧ́тый же на́десѧть де́нь втора́гѡ мцⷭ҇а и҆зше́дшымъ и҆̀мъ ѿ землѝ є҆гѵ́петскїѧ,
Нав.3:7–8, 14–17
7 И҆ речѐ гдⷭ҇ь ко і҆исꙋ́сꙋ: въ се́й де́нь начина́ю возвыша́ти тѧ̀ пред̾ всѣ́ми сынмѝ і҆и҃левыми, да ᲂу҆вѣ́дѧтъ, ꙗ҆́коже бѣ́хъ съ мѡѷсе́омъ, та́кѡ бꙋ́дꙋ и҆ съ тобо́ю: 8 и҆ нн҃ѣ заповѣ́ждь жерцє́мъ воздвиза́ющымъ кївѡ́тъ завѣ́та, глаго́лѧ: є҆гда̀ вни́дете на ча́сть воды̀ і҆ѻрда́на, и҆ во і҆ѻрда́нѣ ста́нете. 14 И҆ бы́сть є҆гда̀ воздви́гнꙋшасѧ лю́дїе ѿ кꙋ́щъ свои́хъ прейтѝ і҆ѻрда́нъ, жерцы́ же воздвиго́ша кївѡ́тъ завѣ́та гдⷭ҇нѧ пред̾ людьмѝ: 15 є҆гда́ же внидо́ша жерцы̀ воздви́жꙋще кївѡ́тъ завѣ́та гдⷭ҇нѧ во і҆ѻрда́нъ, и҆ но́зи жерцє́въ воздвиза́ющихъ кївѡ́тъ завѣ́та гдⷭ҇нѧ ѡ҆мочи́шасѧ въ ча́сти воды̀ і҆ѻрда́на, і҆ѻрда́нъ же наполнѧ́шесѧ во всѧ̑ краи̑ своѧ̑, ꙗ҆́коже во дни̑ жа́твы пшени́цы: 16 и҆ ста́ша во́ды текꙋ́щыѧ свы́ше, ста̀ ѡ҆гꙋстѣ́нїе є҆ди́но ѿлꙋчи́вшеесѧ дале́че ѕѣлѡ̀ ѕѣлѡ̀ ѿ а҆дамѝ гра́да да́же до страны̀ карїаѳїарі́ма: низтекꙋ́щаѧ же низтечѐ въ мо́ре а҆ра́вско, въ мо́ре сла́ное, до́ндеже до конца̀ ѡ҆скꙋдѣ̀. 17 И҆ лю́дїе стоѧ́хꙋ прѧ́мѡ і҆ерїхѡ́нꙋ. И҆ ста́ша жерцы̀ воздвиза́ющїи кївѡ́тъ завѣ́та гдⷭ҇нѧ на сꙋ́сѣ посредѣ̀ і҆ѻрда́на: и҆ всѝ сы́нове і҆и҃лєвы прехожда́хꙋ по сꙋ́хꙋ, до́ндеже сконча́ша всѝ лю́дїе преходѧ́ще і҆ѻрда́нъ.
4Цар.2:6–14
6 И҆ речѐ є҆мꙋ̀ и҆лїа̀: сѣдѝ здѣ̀, ꙗ҆́кѡ гдⷭ҇ь посла́ мѧ до і҆ѻрда́на. И҆ речѐ є҆лїссе́й: жи́въ гдⷭ҇ь и҆ жива̀ дꙋша̀ твоѧ̀, а҆́ще ѡ҆ста́влю тебє̀. И҆ поидо́ста ѻ҆́ба, 7 и҆ пѧтьдесѧ́тъ мꙋже́й ѿ сынѡ́въ проро́ческихъ, и҆ ста́ша проти́вꙋ и҆здале́ча: и҆ сі́и ѻ҆́ба ста́ста при і҆ѻрда́нѣ. 8 И҆ прїѧ́тъ и҆лїа̀ ми́лѡть свою̀, и҆ сви́тъ ю҆̀, и҆ ᲂу҆да́ри є҆́ю въ во́дꙋ, и҆ разстꙋпи́сѧ вода̀ сю́дꙋ и҆ сю́дꙋ: и҆ проидо́ста ѻ҆́ба по сꙋ́хꙋ. 9 И҆ бы́сть преходѧ́щема и҆́ма, и҆ речѐ и҆лїа̀ ко є҆лїссе́еви: просѝ, что̀ сотворю́ ти пре́жде не́же взѧ́тъ бꙋ́дꙋ ѿ тебє̀. И҆ речѐ є҆лїссе́й: да бꙋ́детъ ᲂу҆̀бо дх҃ъ, и҆́же въ тебѣ̀, сꙋгꙋ́бъ во мнѣ̀. 10 И҆ речѐ и҆лїа̀: ѡ҆жесточи́лъ є҆сѝ проси́ти: а҆́ще ᲂу҆́зриши мѧ̀ взе́млема ѿ тебє̀, бꙋ́детъ тѝ та́кѡ: а҆́ще ли не (ᲂу҆́зриши), не бꙋ́детъ. 11 И҆ бы́сть и҆дꙋ́щема и҆́ма, и҆дѧ́ста и҆ глаго́ласта: и҆ сѐ, колесни́ца ѻ҆́гненнаѧ и҆ ко́ни ѻ҆́гненнїи, и҆ раздѣли́ша междꙋ̀ ѻ҆бѣ́ма. И҆ взѧ́тъ бы́сть и҆лїа̀ ви́хромъ ꙗ҆́кѡ на не́бо. 12 И҆ є҆лїссе́й зрѧ́ше и҆ вопїѧ́ше: ѻ҆́тче, ѻ҆́тче, колесни́ца і҆и҃лева и҆ ко́нница є҆гѡ̀. И҆ не ᲂу҆ви́дѣ є҆гѡ̀ ктомꙋ̀: и҆ ꙗ҆́тсѧ (є҆лїссе́й) за ри̑зы своѧ̑, и҆ растерза̀ ѧ҆̀ въ два̀ растєрза́нїѧ, 13 и҆ взѧ̀ ми́лѡть и҆лїинꙋ̀ є҆лїссе́й па́дшꙋю верхꙋ̀ є҆гѡ̀, и҆ возврати́сѧ є҆лїссе́й, и҆ ста̀ на бре́зѣ і҆ѻрда́новѣ. 14 И҆ прїѧ́тъ (є҆лїссе́й) ми́лѡть и҆лїинꙋ̀, ꙗ҆́же падѐ верхꙋ̀ є҆гѡ̀, и҆ ᲂу҆да́ри въ во́дꙋ, и҆ не разстꙋпи́сѧ вода̀. И҆ речѐ: гдѣ̀ бг҃ъ и҆лїи́нъ а҆ффѡ̀; И҆ ᲂу҆да́ри є҆лїссе́й во́ды (втори́цею), и҆ разстꙋпи́шасѧ сю́дꙋ и҆ сю́дꙋ {Є҆вр.: и҆ ᲂу҆да́ри въ во́дꙋ и҆ речѐ: гдѣ̀ гдⷭ҇ь бг҃ъ и҆лїи́нъ, и҆ є҆гда̀ са́мъ та́кожде ᲂу҆да́ри во́ды, и҆ разстꙋпи́шасѧ сю́дꙋ и҆ сю́дꙋ.}, и҆ пре́йде є҆лїссе́й по сꙋ́хꙋ.
4Цар.5:9–14
9 И҆ прїи́де неема́нъ на ко́нехъ и҆ на колесни́цѣхъ и҆ ста̀ при две́рехъ до́мꙋ є҆лїссе́ева. 10 И҆ посла̀ є҆лїссе́й посла́нника къ немꙋ̀, глаго́лѧ: ше́дъ и҆змы́йсѧ седми́жды во і҆ѻрда́нѣ, и҆ возврати́тсѧ пло́ть твоѧ̀ къ тебѣ̀, и҆ ѡ҆чи́стишисѧ. 11 И҆ разгнѣ́васѧ неема́нъ, и҆ ѿи́де, и҆ речѐ: сѐ, ᲂу҆́бѡ глаго́лахъ, ꙗ҆́кѡ и҆зы́детъ ко мнѣ̀, и҆ ста́нетъ, и҆ призове́тъ во и҆́мѧ бг҃а своегѡ̀, и҆ возложи́тъ рꙋ́кꙋ свою̀ на мѣ́сто, и҆ ѡ҆чи́ститъ прока́зꙋ: 12 не бла́ги ли а҆вана̀ и҆ фарфа́ръ рѣ́ки дама́скѡвы па́че і҆ѻрда́на и҆ всѣ́хъ во́дъ і҆и҃левыхъ; не ше́дъ ли и҆змы́юсѧ въ ни́хъ и҆ ѡ҆чи́шꙋсѧ; И҆ ᲂу҆клони́сѧ и҆ ѿи́де во гнѣ́вѣ. 13 И҆ прибли́жишасѧ ѻ҆́троцы є҆гѡ̀ и҆ рѣ́ша є҆мꙋ̀: а҆́ще бы ве́лїе сло́во глаго́лалъ прⷪ҇ро́къ тебѣ̀, не бы ли сотвори́лъ є҆сѝ; а҆ ꙗ҆́кѡ речѐ къ тебѣ̀: и҆змы́йсѧ, и҆ ѡ҆чи́стишисѧ. 14 И҆ сни́де неема́нъ, и҆ погрꙋзи́сѧ во і҆ѻрда́нѣ седми́жды, по глаго́лꙋ є҆лїссе́евꙋ: и҆ возврати́сѧ пло́ть є҆гѡ̀ ꙗ҆́кѡ пло́ть ѻ҆троча́те мла́да, и҆ ѡ҆чи́стисѧ.
Ис.1:16–20
16 И҆змы́йтесѧ, (и҆) чи́сти бꙋ́дите, ѿими́те лꙋка̑вства ѿ дꙋ́шъ ва́шихъ пред̾ ѻ҆чи́ма мои́ма, преста́ните ѿ лꙋка́вствъ ва́шихъ. 17 Наꙋчи́тесѧ добро̀ твори́ти, взыщи́те сꙋда̀, и҆зба́вите ѡ҆би́димаго, сꙋди́те си́рꙋ и҆ ѡ҆правди́те вдови́цꙋ, 18 и҆ прїиди́те, и҆ и҆стѧ́жимсѧ, гл҃етъ гдⷭ҇ь. И҆ а҆́ще бꙋ́дꙋтъ грѣсѝ ва́ши ꙗ҆́кѡ багрѧ́ное, ꙗ҆́кѡ снѣ́гъ ᲂу҆бѣлю̀: а҆́ще же бꙋ́дꙋтъ ꙗ҆́кѡ червле́ное, ꙗ҆́кѡ во́лнꙋ ᲂу҆бѣлю̀. 19 И҆ а҆́ще хо́щете и҆ послꙋ́шаете менѐ, блага̑ѧ землѝ снѣ́сте: 20 а҆́ще же не хо́щете, нижѐ послꙋ́шаете менѐ, ме́чь вы̀ поѧ́стъ: ᲂу҆ста́ бо гдⷭ҇нѧ гл҃аша сїѧ̑.
Быт.32:1–10
1 И҆ і҆а́кѡвъ и҆́де въ пꙋ́ть сво́й. И҆ воззрѣ́въ ви́дѣ по́лкъ бж҃їй воѡполчи́вшїйсѧ: и҆ срѣто́ша є҆го̀ а҆́гг҃ли бж҃їи. 2 Рече́ же і҆а́кѡвъ, є҆гда̀ ви́дѣ и҆̀хъ: по́лкъ бж҃їй се́й. И҆ прозва̀ и҆́мѧ мѣ́стꙋ томꙋ̀ полкѝ. 3 Посла́ же і҆а́кѡвъ послы̀ пред̾ собо́ю ко и҆са́ѵꙋ бра́тꙋ своемꙋ̀ въ зе́млю сиі́ръ, въ странꙋ̀ є҆дѡ́мъ, 4 и҆ заповѣ́да и҆̀мъ глаго́лѧ: та́кѡ рцы́те господи́нꙋ моемꙋ̀ и҆са́ѵꙋ: та́кѡ глаго́летъ ра́бъ тво́й і҆а́кѡвъ: ᲂу҆ лава́на ѡ҆бита́хъ и҆ ᲂу҆ме́длихъ да́же до нн҃ѣ: 5 и҆ бы́ша мѝ воло́ве и҆ ѻ҆слы̀ и҆ ѻ҆́вцы, и҆ рабѝ и҆ рабы̑ни: и҆ посла́хъ повѣ́дати господи́нꙋ моемꙋ̀ и҆са́ѵꙋ, дабы̀ ѡ҆брѣ́лъ ра́бъ тво́й благода́ть пред̾ тобо́ю. 6 И҆ возврати́шасѧ послы̀ ко і҆а́кѡвꙋ, глаго́люще: ходи́хомъ ко бра́тꙋ твоемꙋ̀ и҆са́ѵꙋ, и҆ сѐ, са́мъ и҆́детъ во срѣ́тенїе тебѣ̀, и҆ четы́риста мꙋже́й съ ни́мъ. 7 Оу҆боѧ́сѧ же і҆а́кѡвъ ѕѣлѡ̀ и҆ въ недоꙋмѣ́нїи бѣ̀: и҆ раздѣлѝ лю́ди сꙋ́щыѧ съ собо́ю, и҆ волы̀ и҆ вельблю́ды и҆ ѻ҆́вцы на два̀ полка̑, 8 и҆ речѐ і҆а́кѡвъ: а҆́ще прїи́детъ и҆са́ѵъ на є҆ди́нъ по́лкъ и҆ и҆зсѣче́тъ и҆̀, бꙋ́детъ вторы́й по́лкъ во спасе́нїи. 9 Рече́ же і҆а́кѡвъ: бг҃ъ ѻ҆тца̀ моегѡ̀ а҆враа́ма и҆ бг҃ъ ѻ҆тца̀ моегѡ̀ і҆саа́ка, гдⷭ҇и бж҃е, ты̀ рекі́й мѝ: и҆дѝ въ зе́млю рожде́нїѧ твоегѡ̀, и҆ бла́го тебѣ̀ сотворю̀: 10 довлѣ́етъ мѝ ѿ всеѧ̀ пра́вды и҆ ѿ всеѧ̀ и҆́стины, ю҆́же сотвори́лъ є҆сѝ рабꙋ̀ твоемꙋ̀: съ жезло́мъ бо си́мъ преидо́хъ і҆ѻрда́нъ се́й, нн҃ѣ же бѣ́хъ въ два̀ полка̑:
Исх.2:5–10
5 Сни́де же дще́рь фараѡ́нова и҆змы́тисѧ на рѣкꙋ̀, и҆ рабы̑ни є҆ѧ̀ прохожда́хꙋ при рѣцѣ̀. И҆ ви́дѣвши ковче́жецъ въ лꙋчи́цѣ, посла́вши рабы́ню, взѧ̀ и҆̀. 6 Ѿве́рзши же, ви́дитъ ѻ҆троча̀ пла́чꙋщеесѧ въ ковче́жцѣ, и҆ пощадѣ̀ є҆̀ дще́рь фараѡ́нѧ, и҆ речѐ: ѿ дѣте́й є҆вре́йскихъ сїѐ. 7 И҆ речѐ сестра̀ є҆гѡ̀ дще́ри фараѡ́новѣ: хо́щеши ли, призовꙋ́ ти женꙋ̀ корми́лицꙋ ѿ є҆врє́й, и҆ воздои́тъ тѝ ѻ҆троча̀; 8 И҆ речѐ є҆́й дще́рь фараѡ́нова: и҆дѝ. Ше́дши же ѻ҆трокови́ца, призва̀ ма́терь ѻ҆троча́те. 9 Рече́ же къ не́й дще́рь фараѡ́нова: соблюди́ ми ѻ҆троча̀ сїѐ и҆ воздо́й мѝ є҆̀: а҆́зъ же да́мъ тѝ мздꙋ̀. Взѧ́ же ѻ҆троча̀ жена̀ и҆ доѧ́ше є҆̀. 10 Возмꙋжа́вшꙋ же ѻ҆троча́ти, введѐ є҆̀ ко дще́ри фараѡ́новѣ, и҆ бы́сть є҆́й въ сы́на, и҆ наречѐ и҆́мѧ є҆мꙋ̀ мѡѷсе́й, глаго́лющи: ѿ воды̀ взѧ́хъ є҆го̀.
Суд.6:36–40
36 И҆ речѐ гедеѡ́нъ къ бг҃ꙋ: а҆́ще ты̀ спаса́еши рꙋко́ю мое́ю і҆и҃лѧ, ꙗ҆́коже гл҃алъ є҆сѝ, 37 сѐ, а҆́зъ положꙋ̀ рꙋно̀ ѻ҆́вчее на гꙋмнѣ̀: и҆ а҆́ще бꙋ́детъ роса̀ на рꙋнѣ̀ то́чїю, и҆ по все́й землѝ сꙋ́ша, ᲂу҆разꙋмѣ́ю, ꙗ҆́кѡ спасе́ши рꙋко́ю мое́ю і҆и҃лѧ, ꙗ҆́коже гл҃алъ є҆сѝ. 38 И҆ бы́сть та́кѡ: и҆ ᲂу҆ра́ни гедеѡ́нъ наꙋ́трїе, и҆ и҆сцѣдѝ рꙋно̀, и҆ и҆стечѐ роса̀ и҆з̾ рꙋна̀, и҆спо́лненъ ѻ҆крі́нъ воды̀. 39 И҆ речѐ гедеѡ́нъ къ бг҃ꙋ: да не разгнѣ́ваетсѧ ꙗ҆́рость твоѧ̀ на мѧ̀, и҆ возглаго́лю є҆щѐ є҆ди́ною, и҆ и҆скꙋшꙋ̀ є҆щѐ є҆ди́ною рꙋно́мъ: да бꙋ́детъ сꙋ́ша на рꙋнѣ̀ то́кмѡ, и҆ по все́й землѝ да бꙋ́детъ роса̀. 40 И҆ сотворѝ бг҃ъ та́кѡ въ нощѝ то́й: и҆ бы́сть сꙋ́ша на рꙋнѣ̀ то́кмѡ, и҆ по все́й землѝ бы́сть роса̀.
3Цар.18:30–39
30 И҆ речѐ и҆лїа̀ къ лю́демъ: пристꙋпи́те ко мнѣ̀. И҆ пристꙋпи́ша всѝ лю́дїе къ немꙋ̀. 31 И҆ взѧ̀ и҆лїа̀ двана́десѧть ка́менїй по числꙋ̀ колѣ́нъ і҆и҃левыхъ, ꙗ҆́коже гл҃а къ немꙋ̀ гдⷭ҇ь, гл҃ѧ: і҆и҃ль бꙋ́детъ и҆́мѧ твоѐ. 32 И҆ созда̀ ка́менїе во и҆́мѧ гдⷭ҇не, и҆ и҆сцѣлѝ ѻ҆лта́рь раско́панный, и҆ сотворѝ мо́ре вмѣща́ющее двѣ̀ мѣ̑ры сѣ́мене ѡ҆́крестъ ѻ҆лтарѧ̀. 33 И҆ воскладѐ дрова̀ на ѻ҆лта́рь, є҆го́же сотворѝ, и҆ растеса̀ на ᲂу҆́ды всесожега́ємаѧ, и҆ возложѝ на дрова̀, и҆ воскладѐ на ѻ҆лта́рь. 34 И҆ речѐ и҆лїа̀: принеси́те мѝ четы́ри водоно́сы воды̀, и҆ возлива́йте на всесожже́нїе и҆ на пѡлѣ́на. И҆ сотвори́ша та́кѡ. И҆ речѐ: ᲂу҆дво́йте. И҆ ᲂу҆дво́иша. И҆ речѐ: ᲂу҆тро́йте. И҆ ᲂу҆тро́иша. 35 И҆ прохожда́ше вода̀ ѡ҆́крестъ ѻ҆лтарѧ̀, и҆ мо́ре и҆спо́лнисѧ воды̀. 36 И҆ возопѝ и҆лїа̀ на нб҃о и҆ речѐ: гдⷭ҇и бж҃е а҆враа́мовъ и҆ і҆саа́ковъ и҆ і҆а́кѡвль, послꙋ́шай менѐ, гдⷭ҇и, послꙋ́шай менѐ дне́сь ѻ҆гне́мъ, и҆ да ᲂу҆разꙋмѣ́ютъ всѝ лю́дїе сі́и, ꙗ҆́кѡ ты̀ є҆сѝ гдⷭ҇ь є҆ди́нъ і҆и҃левъ, и҆ а҆́зъ ра́бъ тво́й, и҆ тебє̀ ра́ди сотвори́хъ дѣла̀ сїѧ̑: 37 послꙋ́шай менѐ, гдⷭ҇и, послꙋ́шай менѐ ѻ҆гне́мъ, и҆ да разꙋмѣ́ютъ всѝ лю́дїе сі́и, ꙗ҆́кѡ ты̀ є҆сѝ (꙳є҆ди́нъ) гдⷭ҇ь бг҃ъ, и҆ ты̀ ѡ҆брати́лъ є҆сѝ сердца̀ люді́й си́хъ в̾слѣ́дъ тебє̀. 38 И҆ спадѐ ѻ҆́гнь ѿ гдⷭ҇а съ небесѐ, и҆ поѧдѐ всесожега́ємаѧ, и҆ дрова̀, и҆ во́дꙋ, ꙗ҆́же въ мо́ри, и҆ ка́менїе и҆ пе́рсть полиза̀ ѻ҆́гнь. 39 И҆ падо́ша всѝ лю́дїе на лицѐ своѐ и҆ рѣ́ша: вои́стиннꙋ гдⷭ҇ь бг҃ъ то́й є҆́сть бг҃ъ.
4Цар.2:19–22
19 И҆ рѣ́ша мꙋ́жїе гра́да ко є҆лїссе́ю: сѐ, жили́ще гра́да бла́го, ꙗ҆́коже ты̀, господи́не, ви́диши, но во́ды ѕлы̑ и҆ землѧ̀ непло́дна. 20 И҆ речѐ є҆лїссе́й: принеси́те мѝ водоно́съ но́въ, и҆ всы́плите во́нь со́ль. И҆ взѧ́ша, и҆ принесо́ша къ немꙋ̀. 21 И҆ и҆зы́де є҆лїссе́й на и҆схѡ́дища вѡдна́ѧ, и҆ всы́па тꙋ̀ со́ль, и҆ речѐ: си́це гл҃етъ гдⷭ҇ь: и҆сцѣли́хъ во́ды сїѧ̑, не бꙋ́детъ ѿ ни́хъ ктомꙋ̀ сме́рти и҆ непло́дства. 22 И҆ и҆сцѣлѣ́ша во́ды до днѐ сегѡ̀, по глаго́лꙋ є҆лїссе́евꙋ, є҆го́же глаго́ла.
Ис.49:8–15
8 Та́кѡ гл҃етъ гдⷭ҇ь: во вре́мѧ прїѧ́тно послꙋ́шахъ тебѐ и҆ въ де́нь спⷭ҇нїѧ помого́хъ тѝ, и҆ сотвори́хъ тѧ̀ и҆ да́хъ тѧ̀ въ завѣ́тъ вѣ́чный ꙗ҆зы́кѡвъ, є҆́же ᲂу҆стро́ити зе́млю и҆ наслѣ́дити наслѣ̑дїѧ пꙋсты́ни, 9 гл҃юща сꙋ́щымъ во ᲂу҆́захъ: и҆зыди́те, и҆ сꙋ́щымъ во тьмѣ̀: ѿкры́йтесѧ. На всѣ́хъ пꙋте́хъ пасти́сѧ бꙋ́дꙋтъ, и҆ на всѣ́хъ стезѧ́хъ па́жить и҆́хъ: 10 не вза́лчꙋтъ, нижѐ вжа́ждꙋтъ, нижѐ порази́тъ и҆̀хъ зно́й, нижѐ со́лнце, но ми́лꙋѧй и҆̀хъ ᲂу҆тѣ́шитъ и҆̀хъ и҆ сквозѣ̀ и҆сто́чники водны̑ѧ проведе́тъ и҆̀хъ. 11 И҆ положꙋ̀ всѧ́кꙋ го́рꙋ въ пꙋ́ть и҆ всѧ́кꙋ стезю̀ въ па́ствꙋ и҆̀мъ. 12 Сѐ, сі́и и҆здале́ча прїи́дꙋтъ, сі́и ѿ сѣ́вера и҆ ѿ мо́рѧ, и҆ні́и же ѿ землѝ пе́рсскїѧ. 13 Ра́дꙋйтесѧ, небеса̀, и҆ весели́сѧ, землѐ, да ѿры́гнꙋтъ го́ры весе́лїе и҆ хо́лми пра́вдꙋ, ꙗ҆́кѡ поми́лова бг҃ъ лю́ди своѧ̑ и҆ смирє́нныѧ люді́й свои́хъ ᲂу҆тѣ́ши. 14 Рече́ же сїѡ́нъ: ѡ҆ста́ви мѧ̀ гдⷭ҇ь, и҆ бг҃ъ забы́ мѧ. 15 Є҆да̀ забꙋ́детъ жена̀ ѻ҆троча̀ своѐ, є҆́же не поми́ловати и҆сча̑дїѧ чре́ва своегѡ̀; а҆́ще же и҆ забꙋ́детъ си́хъ жена̀, но а҆́зъ не забꙋ́дꙋ тебѐ, гл҃етъ гдⷭ҇ь.
По полиелее:
Чтутся седальны по обычаю.Христо́с яви́ся ми́рови, и весь мир украси́в просвети́, и ми́ра всего́ грехи́ восприя́т, и врага́ всего́ ми́ра низложи́, и освяти́ водны́я исто́чники, и просвети челове́чи ду́шы, чу́до приложи́ся мно́жайших чуде́с. Днесь земля́ и мо́ре Спа́сову благода́ть раздели́ста, и весь мир весе́лия испо́лнися, и предвари́вшаго пра́здника дне́шний пра́здник бо́лий явля́ется, чуде́с процвете́нием. В предвари́вший бо пра́здник Рождества́ Спа́сова, земля́ ра́довашеся, во я́слех всех Влады́ку ви́дящи – во дне́шний же пра́здник Богоявле́ния, мо́ре зело́ весели́тся, яко Иорда́ном свяще́ние прие́мля. В предвари́вший бо пра́здник, несоверше́н во́зрастом Младе́нец показа́шеся, на́шему несоверше́нию послу́шествуя – во дне́шний же пра́здник соверше́н ви́димь есть, и́же от Соверше́ннаго Соверше́нный, и хвали́мь есть. Та́мо бо ро́ждьшагося пропове́да на восто́це преклони́вшаяся звезда́ – зде же креща́ема пропове́дает свы́ше Оте́ц роди́вый. Та́мо волсви́ пе́ши от восто́ка ше́ствовавше, я́ко царю́ да́ры принесо́ша – зде же а́нгели с небесе́ приидо́ша, и я́ко Бо́гу ле́потную слу́жбу принесо́ша. Та́мо повива́шеся пеле́нными ю́зами – зде же разреша́ет плени́цы прегреше́ний. Та́мо царь во оде́жду плотску́ю облечеся я́ко в ри́зу – зде же исто́чники ре́чнии гото́вятся.
Приидите у́бо, и ви́дите пресла́вная чудеса́: от Со́лнца Со́лнце во Иорда́не мы́ющееся, и Огнь в воде́ крестя́щься и от челове́ка Бо́га очища́ющася.
Днесь вся тварь хва́ляще Крещаемаго, вопиет: Благослове́н гряды́й во имя Госпо́дне! Благослове́н всегда́ приходя́й! Не бо пе́рвое се ны́не прихо́дит, но при́сно благослове́н гряды́й во и́мя Госпо́дне. И́же созда́ния ра́ди проразу́мно приходя́, небе́сную у́бо высоту́ непреста́нно соблюда́я, со́лнечное же тече́ние хи́тростию стро́я, и звезд мно́жество неизче́тное чи́сля, возду́х на отдохнове́ние благорастворе́нием согрева́я, мо́ре же многоволне́ное ма́лым песко́м обузда́в, исто́чники от глубины́ неви́димо явля́я, река́м тече́ние несобла́знено наставля́я.
Сия́ у́бо вся ви́дя, глаго́лю: Благослове́н гряды́й во и́мя Госпо́дне. Кто Сей есть, изорцы́ я́ве, о́ блаже́нный Дави́де? – «Бог Госпо́дь, и яви́ся нам». И поне́же яви́ся нам, не то́кмо проро́к Дави́д глаго́лет, но и Па́вел апо́стол послу́шествуя о том, глаго́лет: «Яви́ся благода́ть Бо́жия спаси́тельная всем челове́ком, наставля́ющи нас». Не еди́нем бо, но всем, иуде́ом же и е́ллином креще́нием спасе́ние да́рует о́бщее соде́лование в воде́ крещ́ение.
Прииди́те у́бо, и ви́дите стра́шен пото́п мно́гим бо́льши и лу́чши, и́же при Но́и бы́вшаго. Та́мо бо вода́ пото́пная челове́ческое естество́ умре́ти - сия́ же ны́не вода́ креще́ния уме́ршыя жи́вы сотвори́. Та́мо Ной дре́вом негнию́щим ковче́г соде́ла – зде же ны́не Христо́с разу́мный Ной от нетле́нныя Мари́и теле́сный ковче́г угото́ви. Та́мо Ной ковче́г внеу́ду затвори́, смоло́ю и пе́клом пома́за - зде же Христо́с затво́ры ве́рными теле́сный ковче́г утверди́. Та́мо голуби́ца суче́ц ма́сличен нося́щи, Владыки Христа́ угожде́ние возвести́ – зде же Дух Святы́й в ви́де голуби́не прии́де, Ми́лостиваго Го́спода показу́я.
Но удивля́ет мя Спа́сово смире́ние, му́дростию хоте́ние: я́ко не довле́ е́же от Cоверше́ннаго, соверше́н Младе́нец рожде́н, То́йже ны́не довле́ соверше́нному Отцу́ восприя́тия ра́бия о́браза: но я́ко гре́шник прихо́дит ко креще́нию, но да не бу́дет о́бщия благода́ти соде́лование, собла́зн слы́шащым. Крести́ бо ся Влады́ка Христо́с, не очище́ние прие́мля: но по двема́ о́бразома приводя́ и стро́я: да вода́м освяще́ния дар пода́ст, вся́каго челове́ка на креще́ние приведе́т.
Прии́де бо, рече́, Иису́с от Галиле́и на Иорда́н ко Иоа́нну, крести́тися от него́. Что бя́ше тогда́ соверша́емое, бра́тие? И помышля́ти сия неизрече́нная бе́дно есть: о́чи бо челове́чи вы́шших себе́ не мо́гут зре́ти. Трепе́щет же ми ум, и язы́к отбега́ет изоу́ст, не моги́й изрещи́ неизрече́нных. Те́мже ви́дев Иоа́нн Иису́са гряду́ща к нему́, по́двигом мно́гим се́рдце подви́жа, припа́дая и покланя́яся, и моля́ веща́ше: Что ну́диши мя, Всеси́льне немощна́го, еже сотвори́ти вы́ше си́лы? Како сме́ю крести́ти Тя? Когда́ пла́мень очища́ется от се́на? Когда́ бре́ние омыва́ет исто́чника? Ка́ко крещу́ судию́, пови́нный? Ка́ко крещу́ тя Влады́ко, поро́ка не ви́жду в тебе? Греха́ бо не́си сотвори́л: в кля́тву Ада́млю не впал еси́: аще бо и соше́л, но не преступи́л еси́. Что тружда́ешися о Влады́ко, и соде́яти не́мощному ну́диши? Николи́же бо ничесо́же к нужде́нию подо́бно что сотвори́ти смех.
О́ ка́ко раб Влады́ку любя́ предваря́ет! Твое́, рече́, прише́ствие позна́х, еще́ сый во чре́ве, и язы́ком ма́терним Бо́га Тя ми́ру пропове́дах: вся на Твое́ сре́тение пригото́вих. Рцы ми о́ Влады́ко! Ка́ко прии́мет со́лнце ви́дя всех Влады́ку, от раба́ дерзнове́нно креща́ема, и не а́бие яќоже и содоми́ты, огня́ твоего́ луча́ми опали́т мя? Ка́ко претерпи́т земля́, ви́дящи а́нгелы светя́щася, и от челове́ка гре́шна креща́ема, или́ а́бие свои́х си уст отве́рзши земля́, я́ко Дафа́на и Авиро́на пожре́т мя? Ка́ко же ли крещу́ Тя Влады́ко? От рождества́ у́бо скве́рны не́си прия́л, от пречи́стых бо ложе́сн еси́. Ка́ко скверне́н челове́к сый, очи́щу Бо́га Безгре́шна? Аз тре́бую от Тебе́ крести́тися, Ты ли у́бо гряде́ши ко мне? Крести́ти мя посла́л еси́ Влады́ко, и не преслу́шах Твоего́ повеле́ния: вся бо моля́ и приводя́ на креще́ние, глаго́лах: испове́дайтеся Го́сподеви я́ко благ. Несть бо приходя́й напра́сно: Благ бо от Блага́го родився, и не пома́лу благо́е показу́еши: и а́бие прилага́я рече́: во веки бо ми́лость Его́.
Глаго́ла ему́ Иису́с: оста́ви ны́не, та́ко бо подоба́ет нам испо́лнити вся́ку пра́вду. Тогда́ оста́ви его. И крести́вся Иису́с, взы́де а́бие от воды́. Сего́ ра́ди до́ле небе́сныя си́лы хва́ляще Его́ глагола́ху: «Благослове́н гряды́й во имя Госпо́дне, Бог Господ́ь и яви́ся [нам]».
Яви́ся пра́ведное Со́лнце, и тму неве́дения разгна́. Яви́ся Па́стырь небе́сный, и диа́воли полки́ от ста́да отгна́. Яви́ся всех Живо́т, и смерть сме́рти ра́ди умертви́, и яќо Безсме́ртен, животу́ безсме́ртному сподо́би уме́ршыя, и поне́же безме́рна есть ми́лость Его́. Яви́ся Единоро́дный Сын Бо́жий, и креще́ния ра́ди ве́рным сыновство́ дарова́.
Но сим си́це совершаемым Оте́ц свы́ше ра́дуяся о терпе́нии Сыно́вне, и смиреному́дрии, непостоя́нно врата́ небе́сная отве́рз, и громови́дно испусти́ глас, испо́лнен положе́нием оте́ческим: «Сей есть Сын Мой Возлю́бленный, о Не́мже благоволи́х». И да не разделя́ется слы́шащих ум на крестя́щаго и на Креща́емаго, прихо́дит Дух Святы́й в ви́де голуби́не, а́ки персто́м показу́я Креща́емаго, и глас с небесе́: «Сей есть Сын Мой Возлю́бленный, о Не́мже благоволи́х, Того́ послу́шайте».
Тому́ бо есть сла́ва и держа́ва, честь и поклоне́ние, ны́не и пр́исно, и во ве́ки веко́в. Ами́нь.
Евангелие на утрени:
Мк. 2А
9 [Заⷱ҇ 2] И҆ бы́сть во ѻ҆́нѣхъ дне́хъ, прїи́де і҆и҃съ ѿ назаре́та галїле́йскагѡ и҆ крⷭ҇ти́сѧ ѿ і҆ѡа́нна во і҆ѻрда́нѣ. 10 И҆ а҆́бїе восходѧ̀ ѿ воды̀, ви́дѣ разводѧ̑щасѧ небеса̀ и҆ дх҃а ꙗ҆́кѡ го́лꙋбѧ, сходѧ́ща на́нь. 11 И҆ гла́съ бы́сть съ небесѐ: ты̀ є҆сѝ сн҃ъ мо́й возлю́бленный, ѡ҆ не́мже бл҃говоли́хъ.
По третьей песни:
Чтутся седальны по обычаю.Днесь возлю́бленнии пропове́дника и́стины прии́м, реку́ же, Па́вла апо́стола сло́во вопию́ к вам: Яви́ся благода́ть Бо́жия спаси́тельная всем челове́ком. Яви́ся Единоро́дный Сын и Сло́во О́тчее, Единоро́дный от Еди́ныя Де́вы Ма́тере. Яви́ся Творе́ц небе́сных тва́рей, да во́инства а́нгел приведе́т на зе́млю. Яви́ся Творе́ц со́лнечных заре́й, Со́лнце пра́ведное в ми́ре, и тму нече́стия разгна́. Яви́ся Творе́ц челове́ческому естеству́, да пре́жде сотворе́ннаго Ада́ма призове́т в пе́рвую его́ сла́ву. Яви́ся Па́стырь слове́сных ове́ц о́бразом о́вчим, да врага́ привле́к, попра́ну ему́ о́вцами бы́ти сотвори́т. Яви́ся Па́стырь до́брый, да жезло́м креста́ нечи́стыя во́лки из Своея́ па́ствы изжене́т. Яви́ся заблу́ждьшым овца́м милосе́рдый Вождь ста́ду, да введе́т в пала́ту Свою́ о́вцы, си́речь, во Свое́ Ца́рство. Яви́ся Чи́стый от Чи́стыя Деви́цы, да нечистоты́ на́ша омы́ет. Яви́ся Разлучи́вый во́ды, и к вода́м гряды́й, да естество́ вод освяти́т. Яви́ся Влады́ка ми́ру в ми́ре, яко еди́н от мирски́х ми́ра ради. Яви́ся Творе́ц небе́сных и земных тва́рей, я́ко челове́к на Иорда́не крести́тися от Иоа́нна: крести́тися от раб́а́ Господи́н: крести́тися Свет от свети́льника хотя́: крести́тися Огнь от се́на тща́ся. Тем и Иоа́нн позна́в Творца́ естеству́, вопия́ше к нему́ глаго́ля: Аз тре́бую от Тебе́ крести́тися, Ты ли гряде́ши ко мне? Аз тре́бую Твоего́ све́та. Аз тре́бую Твоего́ креще́ния, и Твоея́ чистоты́. Аз Твоего́ порожде́ния па́ки хощу́. Аз раб есмь Твоего́ Божества́, о Влады́ко. Аз раб есмь Твоея́ десни́цы. Аз бре́ние есмь Твоея чи́стыя земл́и. Ка́ко дерзну́ скверна́в сый челове́к, оч́истити Бо́га безгре́шна? Ка́ко дерзну́ простре́ти ру́ку свою́ на верх Содержа́щаго вся? Ка́ко дерзну́ прикосну́тися, Его́же полцы́ а́нгельстии трепе́щут? Ка́ко дерзну́ приступи́ти, к Нему́же серафи́ми не сме́ют прибли́житися? Тем и со стра́хом взыва́ху: Свят, Свят, Свят, пои́стинне испо́лнь не́бо сла́вы Твоея́, и земля́ чуде́с Твои́х. Ка́ко дерзну́ приступи́ти к Непристу́пному, Его́же херуви́ми трепе́щут, и вси во́и го́рних сил? Како дерзну́ крести́ти Творца́ естеству́? Ка́ко дерзну́ крести́ти, Его́же не́бо ужасе́ся? Ка́ко дерзну́ крести́ти, Его́же Иорда́н усумне́вся обрати́ся вспять? Ка́ко дерзну́ крести́ти, Его́же купина́ не могу́щи зре́ти распала́шеся, а не сгара́ше? Како дерзну́ крести́ти, Его́же гора́ не терпя́щи куря́шеся? Ка́ко дерзну́ крести́ти, Его́же Авраа́м ви́де, я́коже мо́жет естество́ челове́ческое ви́дети, зе́млю и пе́пел себе́ нарече́? Ка́ко дерзну́ крести́ти, Его́же Исаа́к во сне ви́дев, стра́хом же́ртвенник поткну́? Ќако дерзну́ крести́ти, с Ни́мже Иа́ков бра́вся, и благослове́н быв ублажа́ется? Ка́ко дерзну́ крести́ти, Его́же Ио́сиф усрами́вся сотвори́ти беззако́ние, учи́тель всему́ ми́ру бысть? Ка́ко дерзну́ крести́ти, Его́же Моисе́й ви́дев, возчуди́ся, и гугни́ва язы́ком сам себе́ нарече́? Ка́ко дерзну́ крести́ти, Его́же помо́щника име́я Иису́с Нави́н, Иерихо́н разби́ до земли́? Ка́ко дерзну́ крести́ти, Его́же ви́дев Иса́ия, сам себе́ окая́нна нарече́, Его́же Иезеки́иль ви́дев, к земли́ припаде́? Ка́ко дерзну́ крести́ти, Его́же Дании́л вели́каго о́наго виде́ния сподо́бився трепета́ше? Ка́ко дерзну́ крести́ти, Ему́же Ено́х угоди́в, на ме́сто поко́йное преста́влен бысть? Ка́ко дерзну́ крести́ти, Его́же Илия́ ви́дев небрего́ма иуде́и, желе́зными ключи́ небо им утверди́? Ка́ко дерзну́ крести́ти, Его́же ра́ди той Илия́ сжа́лив си, на коле́снице о́гненных ко́ней взы́де? Ка́ко дерзну́ крести́ти, Его́же Елисе́й моли́в, Иорда́н по су́ху пре́йде? Ка́ко дерзну́ крести́ти, Его́же Сампсо́н моли́в, че́люстию во́инство изби́, и чист сый Бо́гови, непобеди́мь бысть? Ка́ко дерзну́ крести́ти, Его́же Гедео́н моли́в, с мал́ою дружи́ною мадиа́мляны разби́? Ка́ко дерзну́ крести́ти, Его́же Дави́д моли́в, Голиафа уби? Ка́ко дерзну́ крести́ти, Его́же Деви́ца Чи́стая Мари́я роди́, и па́ки по рожде́нии Де́ва пребы́сть? Его́же бо ра́ди блаже́ннии святи́и му́жие досто́йно не могоша ви́дети, Деви́ча Чи́ста утро́ба роди́, я́коже благоволи́. Тебе́ ви́жду во чрепи́не пло́тстей, но разуме́ю а́нгелов и челове́ков Творца́: я́коже бо во чре́ве Тебе́ ужасну́хся, и ны́не вострепещу́ заре́й Божества́ Твоего́ не терпя́. Не сме́ю Тебе́ крести́ти, Го́споди: звезда́ бо волхвы́ наста́вльши, к Твоему́ рождеству́ приведе́. Не сме́ю Тебе́ крести́ти Го́споди: И́род бо слы́шав Тебе́ Царя́, смуща́шеся зело́, и смерть непра́ведну на младе́нцы стро́яше, и бре́ние своего́ Творца́ стреля́ше, и прах Огню́ противля́шеся. О́ Влады́ко Го́споди! Что мя ну́диши сотвори́ти немощно́е? Что беди́ши мя держа́ти несодержи́маго? Что еже вы́ше мене́ твори́ти ми повелева́еши? Не навы́кла есть рука́ моя́ дерза́ти на огнь. Никогда ́же омыв́ает исто́чника брение, ниже́ очища́ет сме́ртный безсме́ртнаго, ниже́ святи́т гре́шный А́гнца Бо́жия, взе́млющаго грехи́ ми́ра. Вем, что есмь, и что бех, не забыва́ю. Вем что сый, и е́же зело́ све́дый. Вем, что есмь, и е́же бе, и бысть. И реку́: Ты Го́споди, Госпо́дь, аз же раб. Ты Творе́ц, аз же тварь. Ты Со́лнце, аз же заря́. Ты Па́стырь, аз же овца́. Ты Царь, аз же во́ин. Ты Свет, аз же светил́ьник. Ты Архиере́й, аз же слуга́. Ты небе́сный Престо́л, аз же подно́жие ногу́ твое́ю. Ты Небе́сный, аз же землены́й. И па́ки: Ты мене́ ра́ди земле́н, аз же во пло́ти. Ты без пло́ти, аз же во пло́ти ви́димь. Аз сме́ртен, Ты же Безсме́ртен, и сме́ртию в ме́ртвых, и И́же в ме́ртвых свобо́дь. Аз во о́бразе, Ты же преве́чный, и во о́бразе мене́ ра́ди был еси́ по мне, да мене́ спасе́ши. Не постыд́елся еси́ от жены́ роди́тися о́ Го́споди! Де́ву взем, и Ма́терь сотвори́л еси́: и па́ки Де́ву Ея́ показ́ал еси́. К воде́ прише́л еси́, и от челове́ка хо́щеши крести́тися, Творе́ц небесе́ и вод, от Ма́тере Единоро́ден яви́лся, и́же во двою́ естеству́ позна́н быв, И́же в ве́тсем и в но́вем заве́те пропове́дуемь, И́же Це́рковь от двои́х люде́й соста́ви: реку́ же, от язы́к и от иуде́й. Сей неизглаго́ланный Твоея́ му́дрости сове́т, проро́ком Святы́м Ду́хом издале́ча вопия́ше: Благослове́н гряды́й во и́мя Госпо́дне, Бог Госпо́дь и яви́ся нам. Что твори́ши Го́споди: вем тя Влады́ку естества́, вем Тя Творца́ тва́ри, вем Тя древне́йша небесе́ и земли́: вем Тя Творца́ Ада́му: вем Тя старе́йша Авраа́ма. Иису́с же рече́ ему́: оста́ви ны́не, я́ко проро́к бо, и бо́лий всех проро́к пропове́дая Мое́ Божество́ и челове́чество. Мой бо есть глас глаго́ляй: Бо́лий Иоа́нна Крести́теля во проро́цех не воста́: оста́ви ны́не, си́це бо подоба́ет нам испо́лнити вся́ку пра́вду. Тогда́ рече́ к Нему́ Иоа́нн: Освяти́ти мене́ прише́л еси́ и во́ды, не глаго́лю Го́споди проти́ву вла́сти Твоея́: сокруши́ти прише́л еси́ главу́ зми́еву в воде́ Твои́м креще́нием: бу́ди во́ля Твоя́, порожде́ния купе́ль па́ки хо́щеши дати челове́ком. Попущу́ у́бо аз служи́ти Тебе́, преслу́шати бо не сме́ю, а́ще и нача́ти дерзну́, простру́ десни́цу мою́ на Тя, Седя́щаго одесну́ю Отца́, возложу́ дла́ни мои́ на верх Соверши́вшаго небес́а. И прикосну́вся Иоа́нн пречи́стому верху́ Госпо́дню, крести́ Еди́наго от Святы́я Тро́ицы. И а́бие ви́де небеса́ отве́рста, и Дух Святы́й я́ко го́лубь сходя́щь, и гряду́щь Нань. И помолча́в Иоа́нн, слы́ша глас Оте́ческий, свиде́тельствующь Единоро́дному Сы́ну: Сей есть Сын Мой Возлю́бленный, о Не́мже благоволи́х. Сей есть, И́же со Мно́ю сотвори́ пе́рваго челове́ка, и́же в раи́. Сей есть, И́же небеса́ окружи́. Сей есть, И́же чи́ны а́нгельския устро́и. Сей есть, И́же со́лнце и луну́ хи́тростию сотвори́, и Со́лнце пра́ведное во Иорда́не крестя́шеся. Сей есть Сын Мой Возлю́бленный, о Не́мже благоволи́х. Па́ки Оте́ческаго послу́шаем гла́са: На горе́ бо Фаво́рстей со ученики́ бы́вшу Спа́су, Отец нерожде́нный Единоро́дному Своему́ Сы́ну глас посла́, везде сказу́я, я́ко Единоро́дный Его́ Сын, горе́ и до́ле стро́я все. Но мы зде сло́во оста́вим, и нас ра́ди от Де́вы Ро́ждшемуся, и во Иорда́не Крести́вшемуся от Иоа́нна поклони́мся, Его́же ра́ди весь мир освяща́ется, и лю́дие спаса́ются, и ца́рствие храни́тся, и свяще́нничество ра́дуется, и богопозна́ние святи́тся, и идолослуже́ние паде́ся, явле́ния ра́ди Го́спода на́шего Иису́са Христа́. Ему́же сла́ва и держа́ва, со Отце́м и Святы́м Ду́хом, ны́не и при́сно и во ве́ки веко́в. Ами́нь.
По шестой песни:
И поется кондак и икос (или мученичен, аще несть).Стихи́:
Небеса́ Креще́ние Христо́во разве́рзе,
И́же Сего́ не скаре́дующихся внутрь вво́дит:
Крести́ в реце́ Христа́ Предоте́ча в шесты́й.
Свято́е Богоявле́ние пра́зднуем Го́спода и Бо́га и Спа́са на́шего Иису́са Христа́ в це́ркви, е́же по граде́х во святы́х це́рквах всено́щное бде́ние от ве́чера дне соверша́юще. Сам бо Сло́во и Бог, ве́тхаго Адама оболки́йся, и вся зако́нная соверши́в, и к вели́кому Иоа́нну Предоте́чи прихо́дит крести́тися, и́же и преща́ше Ему́, глаго́ля: «Аз тре́бую от Тебе́ крести́тися, и Ты ли гряде́ши ко мне». Да внегда́ "оста́ви", уже́ от Го́спода слы́шав, и́же приидо́х, рече́, вся́ко оправда́ние испо́лнити: и е́же о креще́нии бы́ти позна́в, оста́ви Его́. И крести́вся Иису́с, вся́кое же естество́ челове́ческое освяти́, и вся́кий же челове́ческий грех погребе́ во струя́х Иорда́нских, и а́бие взы́де от воды́, и ве́тхаго во гресе́х челове́ка обнови́в и украси́в, и небе́сное Ца́рство тому́ дарова́.
В то́йже день поуче́ние на Креще́ние Госпо́дне
При́сно подо́бно есть нам бр́атие, по́двиг добр с ве́рою и любо́вию явля́ющым спе́яти в зако́не Госпо́дни, и разумева́ти, ка́ко и почто́ от небытия́ в бытие́ Бо́гом сотворе́ни бы́ша? Та́же и ле́стию зми́евою, при́сно живу́щую жизнь на смерть премени́хом, и в тле́ние впа́дше зло́бою удали́хомся от Бо́га. И я́же бе в рабо́ту нам тварь поручена́, той повину́вшеся, и все бо́ги сотвори́хом, со́лнце же, реку́, и ме́сяц, и ре́ки, и исто́чники, все тле́ние, да́же и до гадо́в, всему́ порабо́тихомся. И егда́ в неча́яние жизнь сию́ вложи́хом, тогда́ посети́ нас вы́шния благода́ти си́ла, и сла́ва Бо́жия: и Бог в на́ше естество́ вме́щся, и бысть вку́пе Бог и Челове́к, сугу́б естество́м, стра́сти и неду́ги на́ша на Себе́ восприи́м, безсе́менна плоть бысть. Пе́рвее рожде́ние име́я безнача́льно и преве́чно от Отца́ без ма́тере, вы́шними си́лами непреста́нно прославля́ема. То́йже па́ки плотско́е рождество́ прия́т нас ра́ди, без отца́ от Де́вы Пречи́стыя, я́же и Богородица нари́чется. Рождество́м Свои́м обнови́, обетша́вший грехо́м род наш: и днесь на во́ды Иорда́нския прии́де, смирения о́браз явля́я, пречи́стый верх Свой приклоня́ше под ру́це бре́ннаго естества́: Ну́жно у́бо сотвори́ небе́сным си́лам, я́ко в ни́щетне о́бразе, прише́д а́ки прост челове́к, и главу́ Свою́ рабу́ приклоня́ет: Его́же ви́дев Иорда́н, и от пе́рвых чуде́с показа́ Его́ Творца́ своего́, с тре́петом ше́ствие свое́ возврати́. Тварь безду́шна су́щи со стра́хом работа́ет Творцу́ своему́: а мы бра́тие дунове́ние и о́браз су́ще Его́, не почита́ем подо́бно Творца́ своего́: но а́ки сви́ния в ка́ле грехо́внем, при́сно тружда́еми есмы́: самохо́тием за́висти повину́вшеся, гне́вом исполня́ющеся, похотьми́ ле́стными жития́ сего́ омрача́ющеся, немилосе́рдием и ску́постию, наипа́че же ле́ностию лиша́ющеся всего́ добра́.
Те́мже молю́ вы, не до конца́ пребу́дем в такове́м зле: но воспря́нем, и я́ко от сна убуди́мся, покаяние прие́млюще: смире́нием украша́ющеся: братолю́бием, и страннолю́бием, к Бо́гу приближа́ющеся: поще́нием, на не́бо вознося́щеся: ми́лостынею, сы́нове Бо́жии сотворя́ющеся, и прие́млюще досто́йне пречи́стое Те́ло, и Кровь Христо́ву: и та́ко от грех свои́х очи́стимся. Рече́ у́бо святы́й апо́стол: А́ще кто недосто́ин сый прие́млет Те́ло Бо́жие, то грех себе́ яст и пие́т, не разсмотря́я Те́ла Христо́ва. Несть сия́ проста́ бра́тие слу́жба, или́ проше́ние е́же прие́млем: но сама́ жива́, и вся освяща́ющая слове́сная же́ртва: Его́же херуви́ми, и серафими со стра́хом трепе́щут, и вся безпло́тныя си́лы не смеют Нань взира́ти, тре́петно дви́жутся. Те́мже у́бо си́лам небе́сным и мы подо́бимся бра́тие, со стра́хом и любо́вию прие́млем Те́ло Его́: и до́брыми делесы́ прибли́жимся к Нему́, и прии́мем Его́, я́ко да и Той прии́мет ны в безконе́чное Свое́ Ца́рствие. Ему́же сла́ва, ку́пно со Отце́м, и со Святы́м Ду́хом, ны́не и при́сно, и во ве́ки веко́в. Ами́нь.