На паремиях вечерни по прокимне:
Быт.17:1-2, 4-8, 3, 9-12, 14
1 Бы́сть же а҆вра́мꙋ лѣ́тъ де́вѧтьдесѧтъ де́вѧть: и҆ ꙗ҆ви́сѧ гдⷭ҇ь а҆вра́мꙋ и҆ речѐ є҆мꙋ̀: а҆́зъ є҆́смь бг҃ъ тво́й, благоꙋгожда́й предо мно́ю и҆ бꙋ́ди непоро́ченъ: 2 и҆ положꙋ̀ завѣ́тъ мо́й междꙋ̀ мно́ю и҆ междꙋ̀ тобо́ю: и҆ ᲂу҆мно́жꙋ тѧ̀ ѕѣлѡ̀. 3 И҆ падѐ а҆вра́мъ на лицы̀ свое́мъ, и҆ речѐ є҆мꙋ̀ бг҃ъ, гл҃ѧ: 4 и҆ а҆́зъ сѐ, завѣ́тъ мо́й съ тобо́ю, и҆ бꙋ́деши ѻ҆те́цъ мно́жества ꙗ҆зы́кѡвъ: 5 и҆ не нарече́тсѧ ктомꙋ̀ и҆́мѧ твоѐ а҆вра́мъ, но бꙋ́детъ и҆́мѧ твоѐ а҆враа́мъ: ꙗ҆́кѡ ѻ҆тца̀ мно́гихъ ꙗ҆зы́кѡвъ положи́хъ тѧ̀: 6 и҆ возращꙋ́ тѧ ѕѣлѡ̀ ѕѣлѡ̀, и҆ положꙋ́ тѧ въ наро́ды, и҆ ца́рїе и҆з̾ тебє̀ и҆зы́дꙋтъ: 7 и҆ поста́влю завѣ́тъ мо́й междꙋ̀ мно́ю и҆ междꙋ̀ тобо́ю, и҆ междꙋ̀ сѣ́менемъ твои́мъ по тебѣ̀ въ ро́ды и҆́хъ, въ завѣ́тъ вѣ́ченъ, да бꙋ́дꙋ тебѣ̀ бг҃ъ и҆ сѣ́мени твоемꙋ̀ по тебѣ̀: 8 и҆ да́мъ тебѣ̀ и҆ сѣ́мени твоемꙋ̀ по тебѣ̀ зе́млю, въ не́йже ѡ҆бита́еши, всю̀ зе́млю ханаа́ню во ѡ҆держа́нїе вѣ́чное, и҆ бꙋ́дꙋ и҆̀мъ бг҃ъ. 9 И҆ речѐ бг҃ъ ко а҆враа́мꙋ: ты́ же завѣ́тъ мо́й соблюде́ши, ты̀ и҆ сѣ́мѧ твоѐ по тебѣ̀ въ ро́ды и҆́хъ. 10 И҆ се́й завѣ́тъ, є҆го́же соблюде́ши междꙋ̀ мно́ю и҆ ва́ми, и҆ междꙋ̀ сѣ́менемъ твои́мъ по тебѣ̀ въ ро́ды и҆́хъ: ѡ҆брѣ́жетсѧ ѿ ва́съ всѧ́къ мꙋ́жескъ по́лъ, 11 и҆ ѡ҆брѣ́жете пло́ть кра́йнюю ва́шꙋ, и҆ бꙋ́детъ въ зна́менїе завѣ́та междꙋ̀ мно́ю и҆ ва́ми. 12 И҆ младе́нецъ ѻ҆смѝ дні́й ѡ҆брѣ́жетсѧ ва́мъ, всѧ́къ мꙋ́жескїй по́лъ въ родѣ́хъ ва́шихъ: и҆ домоча́децъ, и҆ кꙋ́пленый ѿ всѧ́кагѡ сы́на чꙋжда́гѡ, и҆́же нѣ́сть ѿ сѣ́мене твоегѡ̀: ѡ҆брѣ́занїемъ ѡ҆брѣ́жетсѧ домоча́децъ до́мꙋ твоегѡ̀ и҆ кꙋ́пленый. 14 Неѡбрѣ́заный же мꙋ́жескїй по́лъ, и҆́же не ѡ҆брѣ́жетъ пло́ти кра́йнїѧ своеѧ̀ въ де́нь ѻ҆смы́й, погꙋби́тсѧ дꙋша̀ та̀ ѿ ро́да своегѡ̀: ꙗ҆́кѡ завѣ́тъ мо́й разорѝ.
Притч.8:22-30
22 Гдⷭ҇ь созда́ мѧ {Є҆вр.: стѧжа́ мѧ.} нача́ло пꙋті́й свои́хъ въ дѣла̀ своѧ̑, 23 пре́жде вѣ̑къ ѡ҆снова́ мѧ, въ нача́лѣ, пре́жде не́же зе́млю сотвори́ти, 24 и҆ пре́жде не́же бє́здны содѣ́лати, пре́жде не́же произы́ти и҆сто́чникѡмъ во́дъ, 25 пре́жде не́же гора́мъ водрꙋзи́тисѧ, пре́жде же всѣ́хъ холмѡ́въ ражда́етъ мѧ̀. 26 Гдⷭ҇ь сотворѝ страны̑ и҆ ненаселє́нныѧ, и҆ концы̑ населє́нныѧ поднебе́сныѧ. 27 Є҆гда̀ гото́вѧше не́бо, съ ни́мъ бѣ́хъ, и҆ є҆гда̀ ѿлꙋча́ше прⷭ҇то́лъ сво́й на вѣ́трѣхъ, 28 и҆ є҆гда̀ крѣ̑пки творѧ́ше вы̑шнїѧ ѡ҆́блаки, и҆ є҆гда̀ твє́рды полага́ше и҆сто́чники поднебе́сныѧ, 29 и҆ є҆гда̀ полага́ше мо́рю предѣ́лъ є҆гѡ̀, да во́ды не мимои́дꙋтъ ᲂу҆́стъ є҆гѡ̀, и҆ крѣ̑пка творѧ́ше ѡ҆снова̑нїѧ землѝ, бѣ́хъ при не́мъ ᲂу҆строѧ́ющи. 30 А҆́зъ бѣ́хъ, ѡ҆ не́йже ра́довашесѧ, на всѧ́къ же де́нь веселѧ́хсѧ пред̾ лице́мъ є҆гѡ̀ на всѧ́ко вре́мѧ,
Притч.10:31-32
31 Оу҆ста̀ првⷣнагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ: 32 ᲂу҆стнѣ̀ мꙋже́й првⷣныхъ ка́плютъ бл҃года̑ти, ᲂу҆ста́ же нечести́выхъ развраща́ютсѧ.
Притч.11:1-2, 4, 3, 5-12
1 Мѣ̑рила льсти̑ваѧ ме́рзость пред̾ гдⷭ҇емъ, вѣ́съ же првⷣный прїѧ́тенъ є҆мꙋ̀. 2 И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. 3 Оу҆мира́ѧй првⷣникъ ѡ҆ста́ви раска́ѧнїе, ᲂу҆до́бна же быва́етъ и҆ посмѣѧ́тельна нечести́выхъ поги́бель. 4 Соверше́нство пра́выхъ наста́витъ и҆̀хъ, и҆ поползнове́нїе ѿрица́ющихсѧ плѣни́тъ и҆̀хъ. Не ᲂу҆по́льзꙋютъ и҆мѣ̑нїѧ въ де́нь ꙗ҆́рости: пра́вда же и҆зба́витъ ѿ сме́рти. 5 Пра́вда непоро́чнагѡ и҆справлѧ́етъ пꙋти̑, нече́стїе же впа́даетъ въ непра́вдꙋ. 6 Пра́вда мꙋже́й пра́выхъ и҆зба́витъ и҆̀хъ, безсовѣ́тїемъ же ᲂу҆ловлѧ́ютсѧ беззако́ннїи. 7 Сконча́вшꙋсѧ мꙋ́жꙋ првⷣнꙋ, не поги́бнетъ наде́жда: похвала́ же нечести́выхъ поги́бнетъ. 8 Првⷣный ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. 9 Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же првⷣныхъ благопоспѣ́шно. 10 Во бл҃ги́хъ првⷣныхъ и҆спра́витсѧ гра́дъ, и҆ въ поги́бели нечести́выхъ ра́дованїе. 11 Въ блгⷭ҇ве́нїи пра́выхъ возвы́ситсѧ гра́дъ, ᲂу҆сты̑ же нечести́выхъ раскопа́етсѧ. 12 Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дръ безмо́лвїе во́дитъ.
По шестой песни:
И поется кондак и икос (или мученичен, аще несть).Стихи́:
Христу́ обре́завшуся, отсече́ся зако́н:
Зако́ну отсе́кшуся, благода́ть да́сться.
Е́же по пло́ти обре́зание Го́спода и Бо́га и Сп́аса на́шего Иису́са Христа́ бысть в поги́бель зако́нному уче́нию; прия́т же, да духо́вное обре́зание введе́т. Сие́ от о́ного по кру́гу ле́тняго прехожде́ния святы́ми отцы́ торжествова́ти прия́хом, и уже́ что торжеству́ем пра́здник Влады́чень днесь творя́ще, поче́тшаго ра́ди нас Го́спода сие́ воспри́емшему. Ели́ко всеконе́чно поро́ка угонзе́ и непостижи́мое восприя́т, та́ко и обре́зание прия́т зако́нное, та́ко и ерети́ческая загради́ти уста́, плоть не прии́мшу дерза́ющих глаго́лати, но по привиде́нию роди́тися. Ка́ко обре́зался бы, и а́ще не прия́л бы плоть? И неразу́мныя иуде́и воспяти́т, е́же не соблюда́ти субо́ту, и зако́н разреша́юща и оклевета́юща, да́же и до обре́зания зако́нную спа́сшему стра́жу. Почто́ си по осми́х днех свята́го е́же от Де́вы рождества́ благоизво́ли принести́ся Ма́терию и Ио́сифом на ме́сте, иде́же бя́ше обы́чая иуде́ом обре́зоватися, и обре́зася, и нарече́но бысть и́мя Ему́ Иису́с, нарече́ное от а́нгела пре́жде зача́тия во чре́ве деви́честем. И па́ки, прише́д с роди́телема, хожда́ше челове́чески, спе́я во́зрастом, и прему́дростию, и благода́тию во спасе́ние на́ше.
В то́йже день, па́мять и́же во святы́х отца́ на́шего Васи́лия, архиепи́скопа Кеса́рии Каппадоки́йския
Стихи́:
Жив Васи́лие, уме́р о Го́споде:
Жив есть и с на́ми, я́ко глаго́ляй от книг:
В пе́рвый генуа́рия у́мре Васи́лий.
Сей доспе́ в ле́та Уа́лентова, во́ньже и о святе́й ве́ре дерзну́в е́же на А́риеву злосло́вию, ему́же приложи́вся царь, о́гненым судо́м опагубля́я це́рковь. Бя́ше же ем́у оте́ц от По́нта, ма́ти же от Каппадоки́и, во словесе́х же не то́чию о них, но и ве́тхая пре́йде, и вся́ким бо ви́дом проше́д, и наказа́ние на ко́емждо держа́ву стяжа́в, не толи́ко де́йствена ра́ди воздержа́в мудролю́бие, и того́ ради боговиде́нием су́щих, и на престо́л архиере́йский возведе́н бысть, иде́же многия по́двиги о правосла́вней ве́ре подъя́т, тве́рдою м́удростию и неустра́шно епа́рха ужаси́в, и словеса́ изре́к, и́миже инове́рных мудрова́ния, я́ко и громо́м ударя́я, и обы́чное уставле́ние наказа́в, и су́щих ра́зум соста́ви соде́лованно, и во вся́кой доброде́тели Христо́ву па́ству научи́в, ко Го́споду отъи́де. Бя́ше же святы́й во́зрастом высо́к, те́лом сухоня́в и черн во о́бразе; виде́нием похи́л, горбоно́с, бро́ви окруже́ны и бра́дою до́лгою проме́с с седи́ною вма́ле, чело́ я́ сме́рщено, кро́ток, средове́к, в седи́ны дово́лен. Соверша́ет же ся пра́здник его́ во святе́й вели́цей це́ркви.
В то́йже день свята́го му́ченика Васи́лия от Агки́ры
Стихи́:
Рыка́ния зия́ния явле́ния звере́й ди́виих
Васи́лие в кро́тости не убоя́ся.
Сей святы́й му́ченик Ва́силий, бя́ше в ца́рство злочести́ваго Иулиа́на, из Агки́ры гра́да. И за е́же Христа́ чести́ и пропове́дати, ят бысть. И предста́виша его́ пред иге́моном Сатурии́лом. И испове́да Христа́ пред ним со мно́гим дерзнове́нием. Тем пове́шен и стро́ган быв неми́лостивно. Та́же от Агки́ры веде́н бысть в Константи́нь град, и та́мо па́ки стро́ган бысть. Посе́м протя́жен быв, я́ко скочи́ти соста́вом ручны́м ему́ от ран. Та́же на реме́ние ко́жу его́ сре́заша, и желе́зными рожны́ разжже́ными сбодо́ша те́ло его́. И вся до́блественне терпя́ше, и прие́мля по́мощь Бо́жиим заступле́нием. И в пещь о́гненную вве́ржен. Пресла́вно же моли́твами неврежде́н сохране́н бысть. Посе́м в Кесари́ю свя́зан веде́ся. И кня́зем осуди́ся звере́м на изъеде́ние. Свято́му же помо́льшуся, и льви́цею сконча́н быв, и страда́ния вене́ц восприя́т. Свяще́нныя же его́ мо́щи, не́цыи от сро́дник и друго́в приле́жне собра́вше, воня́ми и поня́вами обви́вше, с вели́кою че́стию погребо́ша в наро́читем ме́сте. И последи́ храм че́стен та́мо соде́лаша.
В то́йже день чу́до свята́го Васи́лия, е́же сотвори́ в Нике́и
Уа́лент царь беззако́нный, / брат царя́ Уалентиа́на вели́каго, в Ри́ме ца́рствовавшаго, / изгна́в епи́скопы христиа́нския, и затвори́ це́ркви Христо́вы, и предаде́ власть ариа́ном. / Епи́скопи же реко́ша к царю́: «А́ще прии́дет зде Васи́лий и препре́н бу́дет ариа́ны, то вси мы покори́мся тебе́». / Посла́в же царь, приведе́ Васи́лия в Нике́ю / и претя́ше ему́ сме́ртию, а́ще не причасти́тся ариа́ном. / Васи́лий же рече́: «Даждь мне, царю́, суд, а́ще не разсужду́ в пра́вду, кому́ прия́ти власть церко́вную, или́ ариа́ном с бе́сы, или́ нам христиа́ном, да убие́н бу́ду». / И повеле́ царь бы́ти тому́ та́ко. И собра́ Васи́лий единове́рныя своя́ христиа́ны, / и прише́д к це́ркви, изгна́ ариа́ны из це́ркве, и рече́: / «Не до́бре прия́ли есте́ Бо́жию це́рковь. А́ще есть Бог с ва́ми, ходи́те во след Его́». / И се рек, повеле́ затворити вся двери церковныя, и заваля́ти извну́трь коло́дием. / И рече́ к царю́: «Се суд мой, его́же проси́х у тебе́». / Се затвори́х врата́ церко́вная, да и́мже отве́рзутся моли́твою, тех ве́ру вси и́мем / – и го́де бысть всем суд Васи́лиев. / И ре́ша ариа́не стра́ха ра́ди царе́ва: «Пра́во суди́л еси́». И сотвори́ша ариа́не моли́тву от у́тра и до ве́чера, и не бысть гла́са послуша́ния. / Во у́трий же день прише́д Васи́лий, отгна́ ариа́ны, / и взем кресты́, и́де с кли́росом свои́м к ц́еркви. / Покло́нь же коле́на, моли́тву де́яше. / И внеза́пу бысть гром вели́к, и отверзо́шася две́ри церко́вныя. / И уди́влься царь, отве́рзе це́ркви Христо́вы. / И мно́ги да́ры дав Васи́лию, и отпусти́ его́ с ми́ром. / Но то́кмо сам не ве́рова, не бо от ста́да Христо́вых ове́ц, но до конца́ прельсти́вся от ерети́к. / И шед на Фраки́ю, та́мо жив огнем сожже́н бысть, по проро́честву святи́теля отца́ на́шего Васи́лия.
В то́йже день сло́во о святе́м Васи́лии и о Петре́ бра́те его́, е́же не осужда́ти.
Хощу́ у́бо вам сказа́ти по́весть бла́гу о вели́цем Васи́лии и о блаже́ннем Пе́тре бра́те его́, да со стра́хом послу́шаете. / Петр святы́й Севасти́йский взем стол строе́нием Человеколю́бца Бо́га, / прии́де со свое́ю жено́ю, с сестро́ю же по о́бразу. / Бысть же ре́вность от су́щих, / поропта́ша, я́ко недосто́йно есть епи́скопу с жено́ю ходи́ти. / И мног сове́т сотво́рше, по святы́х пра́вилех, / приидо́ша ко свято́му Васи́лию и пове́даша ему́ о сем. / И сей рад быв, рече́ им: «До́бре приидо́сте, ча́да моя́, иду́ с ва́ми на обличе́ние дело́м», и и́де с ни́ми в Севасти́йский град. Брат же его́ Петр разуме́в прише́ствие его́, сре́те его́ за осмь по́прищь, / и о Го́споде целова́ние да́ста си. / Петр же рече́ к Васи́лию: «А́ки на разбо́йника изше́л еси́ бра́те мой, да похва́тиши мене́». / И прише́дшим в епи́скопию, целова́ния да́ста сестре́ си я́ко Бо́жией неве́сте. / И рече́ ей Васи́лий: «Ра́дуйся о Го́споде блага́я ми неве́сто, па́че же Госпо́дня, я́ко тебе́ де́лма весь труд наш бысть». / Рече́ же ему́ она́: «Ра́дуйся и ты честны́й о́тче, вели́ко бо ми бе жела́ние целова́ти твои́ честни́и но́зе: / сего́ ра́ди моля́хся Го́сподеви ви́дети тя». / И рече́ Васи́лий Петро́ви: «Молю́ тя, бра́те мой, да со драго́ю ми неве́стою ля́жеши в нощь сию́ во святе́й Бо́жией це́ркви». / Петр же рече́ к нему́: «Сотворю́ влады́ко, ели́ко вели́ши». / И пое́м Васи́лий пять муж пра́ведных, / еди́н же бе от них, и́же изве́стно сие́ ве́дяше. / Спя́щу же и самому́ Васи́лию во святе́й Бо́жии це́ркви, / и в полу́нощи возбуди́ вся тай святы́й оте́ц наш Васи́лий. / И рече́ к ним: «Что ви́дите о бра́те мое́м?». / И реко́ша ему́: «Ви́дим пресла́вное чу́до». / И рече́ им: «Что?». / И ре́ша ему́: «Ви́дим а́нгелы ма́жуща ло́жа ею́ без поро́ка». / И рече́ Васи́лий: «Никому́же ви́деннаго пове́дите». / И нау́трия собра́вшеся в це́рковь, повеле́ взя́ти сосу́д желе́зен и принести́ полн у́глий горя́щих. / И рече́: «Простри́, честна́я ми неве́сто, окро́йницу». / И рече́ держа́щым у́глие: «Всы́плите ей во окро́йницу», – и вложи́ша. / И рече́: «Держи́ я́ в па́зусе твое́й». / И повеле́ други́я у́гли принести́. / И рече́: «Бра́те Пе́тре, простри́ фело́нь твой». / И просте́р, прии́м у́глие горя́щее. / Стоя́щима же и́ма у́глие держа́щема горя́ще в ри́зах долг час, ужасо́шася вси лю́дие, ви́дяще чу́до ди́вно, / и воззва́ша: «Госпо́дь просла́ви преподо́бныя Своя́!». / И поверго́ша у́глие, и не бысть на нею́ ды́мныя во́ни, ни ри́зы и́ма опале́ша. / И при всех пяти́х муже́х преподо́бных рече́: «Пове́дите, е́же ви́десте во святе́й Бо́жии це́ркви». / И испове́даша наро́ду, ка́ко ви́деша а́нгелы ма́жуща без поро́ка ло́же ею́. / И просла́виша Бо́га творя́щаго вели́кая и неизсле́дованная чуде́с, просла́вльшаго Своя́ уго́дники. / И мно́го научи́в я́ о ве́ре святы́й отец наш Васи́лий, / и возврати́ся в дом свой, сла́вя Бо́га и Спа́са на́шего Иису́са Христа, / Ему́же сла́ва со Отце́м и Пресвяты́м Ду́хом всегда́, ны́не и при́сно и во ве́ки веко́в. Ами́нь.
Апостол на Литургии:
Кол. 254
2 да ᲂу҆тѣ́шатсѧ сердца̀ и҆́хъ, сне́мшихсѧ въ любвѝ и҆ во всѧ́цѣмъ бога́тствѣ и҆звѣще́нїѧ ра́зꙋма, въ позна́нїе та́йны бг҃а и҆ ѻ҆ц҃а̀ и҆ хрⷭ҇та̀, 3 въ не́мже сꙋ́ть всѧ̑ сокрѡ́вища премⷣрости и҆ ра́зꙋма сокровє́нна. 4 Сїе́ же глаго́лю, да никто́же ва́съ прельсти́тъ въ словопрѣ́нїи: 5 а҆́ще бо и҆ пло́тїю ѿстою̀, но дꙋ́хомъ съ ва́ми є҆́смь, ра́дꙋѧсѧ и҆ ви́дѧ ва́шъ чи́нъ и҆ ᲂу҆твержде́нїе ва́шеѧ вѣ́ры, ꙗ҆́же во хрⷭ҇та̀. 6 Ꙗ҆́коже ᲂу҆̀бо прїѧ́сте хрⷭ҇та̀ і҆и҃са гдⷭ҇а, (та́кожде) въ не́мъ ходи́те, 7 ᲂу҆корене́ни и҆ назда́ни въ не́мъ и҆ и҆звѣ́ствовани вѣ́рою, ꙗ҆́коже наꙋчи́стесѧ, и҆збы́точествꙋюще въ не́й благодаре́нїемъ. 8 [Заⷱ҇ 254] (Бра́тїе,) блюди́тесѧ, да никто́же ва́съ бꙋ́детъ прельща́ѧ фїлосо́фїею и҆ тще́тною ле́стїю, по преда́нїю человѣ́ческомꙋ, по стїхі́амъ мі́ра, а҆ не по хрⷭ҇тѣ̀: 9 ꙗ҆́кѡ въ то́мъ живе́тъ всѧ́ко и҆сполне́нїе бжⷭ҇тва̀ тѣле́снѣ: 10 и҆ да бꙋ́дете въ не́мъ и҆спо́лнени, и҆́же є҆́сть глава̀ всѧ́комꙋ нача́лꙋ и҆ вла́сти: 11 ѡ҆ не́мже и҆ ѡ҆брѣ́зани бы́сте ѡ҆брѣ́занїемъ нерꙋкотворе́ннымъ, въ совлече́нїи тѣ́ла грѣхо́внагѡ пло́ти, во ѡ҆брѣ́занїи хрⷭ҇то́вѣ, 12 спогре́бшесѧ є҆мꙋ̀ кр҃ще́нїемъ: ѡ҆ не́мже и҆ совоста́сте вѣ́рою дѣ́йствїѧ бг҃а, воскреси́вшагѡ є҆го̀ и҆з̾ ме́ртвыхъ:
Евангелие на Литургии:
Лк. 6
20 [Заⷱ҇ 6] И҆ возврати́шасѧ па́стырїе, сла́вѧще и҆ хва́лѧще бг҃а ѡ҆ всѣ́хъ, ꙗ҆̀же слы́шаша и҆ ви́дѣша, ꙗ҆́коже глаго́лано бы́сть къ ни̑мъ. 21 И҆ є҆гда̀ и҆спо́лнишасѧ ѻ҆́смь дні́й, да ѡ҆брѣ́жꙋтъ є҆го̀, и҆ нареко́ша и҆́мѧ є҆мꙋ̀ і҆и҃съ, нарече́нное а҆́гг҃ломъ пре́жде да́же не зача́тсѧ во чре́вѣ. 40 Ѻ҆троча́ же растѧ́ше и҆ крѣплѧ́шесѧ дх҃омъ, и҆сполнѧ́ѧсѧ премⷣрости: и҆ блгⷣть бж҃їѧ бѣ̀ на не́мъ. 41 И҆ хожда́ста роди́тєлѧ є҆гѡ̀ на всѧ́ко лѣ́то во і҆ерⷭ҇ли́мъ въ пра́здникъ па́схи. 42 И҆ є҆гда̀ бы́сть двоюна́десѧти лѣ̑тꙋ, восходѧ́щымъ и҆̀мъ во і҆ерⷭ҇ли́мъ по ѡ҆бы́чаю пра́здника, 43 и҆ сконча́вшымъ дни̑, и҆ возвраща́ющимасѧ и҆́ма, ѡ҆ста̀ ѻ҆́трокъ і҆и҃съ во і҆ерⷭ҇ли́мѣ: и҆ не разꙋмѣ̀ і҆ѡ́сифъ и҆ мт҃и є҆гѡ̀: 44 мнѣ̑вша же є҆го̀ въ дрꙋжи́нѣ сꙋ́ща, преидо́ста днѐ пꙋ́ть, и҆ и҆ска́ста є҆го̀ во сро́дницѣхъ и҆ въ зна́емыхъ: 45 и҆ не ѡ҆брѣ̑тша є҆го̀, возврати́стасѧ во і҆ерⷭ҇ли́мъ, взыска̑юща є҆го̀. 46 И҆ бы́сть по трїе́хъ дне́хъ, ѡ҆брѣто́ста є҆го̀ въ це́ркви, сѣдѧ́щаго посредѣ̀ ᲂу҆чи́телей, и҆ послꙋ́шающаго и҆́хъ, и҆ вопроша́ющаго и҆̀хъ: 47 ᲂу҆жаса́хꙋсѧ же всѝ послꙋ́шающїи є҆гѡ̀ ѡ҆ ра́зꙋмѣ и҆ ѡ҆ ѿвѣ́тѣхъ є҆гѡ̀. 48 И҆ ви̑дѣвша є҆го̀, диви́стасѧ: и҆ къ немꙋ̀ мт҃и є҆гѡ̀ речѐ: ча́до, что̀ сотворѝ на́ма та́кѡ; сѐ, ѻ҆те́цъ тво́й и҆ а҆́зъ болѧ̑ща и҆ска́хома тебѐ. 49 И҆ речѐ къ ни́ма: что̀ ꙗ҆́кѡ и҆ска́ста менѐ; не вѣ́ста ли, ꙗ҆́кѡ въ тѣ́хъ, ꙗ҆̀же ѻ҆ц҃а̀ моегѡ̀, досто́итъ бы́ти мѝ; 50 И҆ та̑ не разꙋмѣ́ста гл҃го́ла, є҆го́же гл҃а и҆́ма. 51 И҆ сни́де съ ни́ма и҆ прїи́де въ назаре́тъ: и҆ бѣ̀ повинꙋ́ѧсѧ и҆́ма. И҆ мт҃и є҆гѡ̀ соблюда́ше всѧ̑ гл҃го́лы сїѧ̑ въ срⷣцы свое́мъ. 52 И҆ і҆и҃съ преспѣва́ше премⷣростїю и҆ во́зрастомъ и҆ блгⷣтїю ᲂу҆ бг҃а и҆ человѣ̑къ.