На паремиях вечерни по прокимне:
Быт.1:1–13
1 Въ нача́лѣ сотворѝ бг҃ъ не́бо и҆ зе́млю. 2 Землѧ́ же бѣ̀ неви́дима и҆ неꙋстро́ена, и҆ тьма̀ верхꙋ̀ бе́здны, и҆ дх҃ъ бж҃їй ноша́шесѧ верхꙋ̀ воды̀. 3 И҆ речѐ бг҃ъ: да бꙋ́детъ свѣ́тъ. И҆ бы́сть свѣ́тъ. 4 И҆ ви́дѣ бг҃ъ свѣ́тъ, ꙗ҆́кѡ добро̀, и҆ разлꙋчѝ бг҃ъ междꙋ̀ свѣ́томъ и҆ междꙋ̀ тьмо́ю. 5 И҆ наречѐ бг҃ъ свѣ́тъ де́нь, а҆ тьмꙋ̀ наречѐ но́щь. И҆ бы́сть ве́черъ, и҆ бы́сть ᲂу҆́тро, де́нь є҆ди́нъ. 6 И҆ речѐ бг҃ъ: да бꙋ́детъ тве́рдь посредѣ̀ воды̀, и҆ да бꙋ́детъ разлꙋча́ющи посредѣ̀ воды̀ и҆ воды̀. И҆ бы́сть та́кѡ. 7 И҆ сотворѝ бг҃ъ тве́рдь, и҆ разлꙋчѝ бг҃ъ междꙋ̀ водо́ю, ꙗ҆́же бѣ̀ под̾ тве́рдїю, и҆ междꙋ̀ водо́ю, ꙗ҆́же бѣ̀ над̾ тве́рдїю. 8 И҆ наречѐ бг҃ъ тве́рдь не́бо. И҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь вторы́й. 9 И҆ речѐ бг҃ъ: да собере́тсѧ вода̀, ꙗ҆́же под̾ небесе́мъ, въ собра́нїе є҆ди́но, и҆ да ꙗ҆ви́тсѧ сꙋ́ша. И҆ бы́сть та́кѡ. И҆ собра́сѧ вода̀, ꙗ҆́же под̾ небесе́мъ, въ собра̑нїѧ своѧ̑, и҆ ꙗ҆ви́сѧ сꙋ́ша. 10 И҆ наречѐ бг҃ъ сꙋ́шꙋ зе́млю, и҆ собра̑нїѧ во́дъ наречѐ морѧ̀. И҆ ви́дѣ бг҃ъ, ꙗ҆́кѡ добро̀. 11 И҆ речѐ бг҃ъ: да прорасти́тъ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ бы́сть та́кѡ. 12 И҆ и҆знесѐ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ ви́дѣ бг҃ъ, ꙗ҆́кѡ добро̀. 13 И҆ бы́сть ве́черъ, и҆ бы́сть ᲂу҆́тро, де́нь тре́тїй.
Чис.24:2–3, 5–9, 17–18
2 И҆ возве́дъ валаа́мъ ѻ҆́чи своѝ, ᲂу҆зрѣ̀ і҆и҃лѧ ѡ҆полчи́вшасѧ по племенѡ́мъ: и҆ бы́сть дх҃ъ бж҃їй на не́мъ. 3 И҆ воспрїи́мъ при́тчꙋ свою̀ речѐ: глаго́летъ валаа́мъ, сы́нъ веѡ́ровъ, глаго́летъ человѣ́къ и҆́стиннѡ зрѧ́й, 5 ко́ль добрѝ до́ми твоѝ, і҆а́кѡве, и҆ кꙋ́щы твоѧ̑, і҆и҃лю: 6 ꙗ҆́кѡ дꙋбра̑вы ѡ҆сѣнѧ́ющыѧ и҆ ꙗ҆́кѡ са́дїе при рѣка́хъ, и҆ ꙗ҆́кѡ кꙋ́щы, ꙗ҆̀же водрꙋзѝ гдⷭ҇ь, и҆ ꙗ҆́кѡ ке́дри при вода́хъ: 7 и҆зы́детъ человѣ́къ ѿ сѣ́мене є҆гѡ̀, и҆ ѡ҆блада́етъ ꙗ҆зы̑ки мно́гими: и҆ возвы́ситсѧ па́че гѡ́га ца́рство є҆гѡ̀, и҆ возрасте́тъ ца́рство є҆гѡ̀: 8 бг҃ъ и҆зведѐ є҆го̀ и҆з̾ є҆гѵ́пта, ꙗ҆́коже сла́ва є҆диноро́га є҆мꙋ̀: поѧ́стъ ꙗ҆зы́ки вра̑гъ свои́хъ и҆ то́лщы и҆́хъ и҆зможди́тъ, и҆ стрѣла́ми свои́ми ᲂу҆стрѣли́тъ врага̀: 9 возле́гъ почѝ ꙗ҆́кѡ ле́въ и҆ ꙗ҆́кѡ скѵ́менъ: кто̀ возбꙋ́дитъ є҆го̀; благословѧ́щїи тѧ̀ благослове́ни, и҆ проклина́ющїи тѧ̀ про́клѧти. 17 покажꙋ̀ є҆мꙋ̀, и҆ не нн҃ѣ: ᲂу҆блажа́ю, и҆ не приближа́етсѧ: возсїѧ́етъ ѕвѣзда̀ ѿ і҆а́кѡва, и҆ воста́нетъ человѣ́къ ѿ і҆и҃лѧ и҆ погꙋби́тъ кнѧ̑зи мѡаві̑тскїѧ, и҆ плѣни́тъ всѧ̑ сы́ны си́ѳѡвы: 18 и҆ бꙋ́детъ є҆дѡ́мъ наслѣ́дїе, и҆ бꙋ́детъ наслѣ́дїе и҆са́ѵъ вра́гъ є҆гѡ̀, и҆ і҆и҃ль сотворѝ крѣ́пость:
Мих. 4:6–7
6 Въ то́й де́нь, гл҃етъ гдⷭ҇ь, соберꙋ̀ сокрꙋше́ннꙋю, и҆ ѿринове́ннꙋю прїимꙋ̀, и҆ и҆̀хже ѿри́нꙋхъ: 7 и҆ положꙋ̀ сокрꙋше́ннꙋю во ѡ҆ста́нокъ и҆ ѿринове́ннꙋю въ ꙗ҆зы́къ крѣ́покъ, и҆ воцр҃и́тсѧ гдⷭ҇ь над̾ ни́ми въ горѣ̀ сїѡ́нѣ ѿнн҃ѣ и҆ до вѣ́ка.
Мих. 5:2–4
2 И҆ ты̀, виѳлее́ме, до́ме є҆фра́ѳовъ, є҆да̀ ма́лъ є҆сѝ, є҆́же бы́ти въ ты́сѧщахъ і҆ꙋ́диныхъ; и҆з̾ тебє́ бо мнѣ̀ и҆зы́детъ старѣ́йшина, є҆́же бы́ти въ кнѧ́зѧ во і҆и҃ли, и҆схо́ди же є҆гѡ̀ и҆з̾ нача́ла ѿ дні́й вѣ́ка. 3 Сегѡ̀ ра́ди да́стъ ѧ҆̀, до вре́мене ражда́ющїѧ породи́тъ, и҆ про́чїи ѿ бра́тїи и҆́хъ ѡ҆братѧ́тсѧ къ сынѡ́мъ і҆и҃лєвымъ. 4 И҆ ста́нетъ, и҆ ᲂу҆́зритъ, и҆ ᲂу҆пасе́тъ па́ствꙋ свою̀ крѣ́постїю гдⷭ҇ь, и҆ въ сла́вѣ и҆́мене гдⷭ҇а бг҃а своегѡ̀ пребꙋ́дꙋтъ: занѐ нн҃ѣ возвели́читсѧ да́же до конє́цъ землѝ.
Ис.11:1–10
1 И҆ и҆зы́детъ же́злъ и҆з̾ ко́рене і҆ессе́ова, и҆ цвѣ́тъ ѿ ко́рене є҆гѡ̀ взы́детъ: 2 и҆ почі́етъ на не́мъ дх҃ъ бж҃їй, дх҃ъ премⷣрости и҆ ра́зꙋма, дх҃ъ совѣ́та и҆ крѣ́пости, дх҃ъ вѣ́дѣнїѧ и҆ бл҃гоче́стїѧ: 3 и҆спо́лнитъ є҆го̀ дх҃ъ стра́ха бж҃їѧ: не по сла́вѣ сꙋди́ти и҆́мать, нижѐ по глаго́ланїю ѡ҆бличи́тъ, 4 но сꙋ́дитъ пра́вдою смире́нномꙋ сꙋ́дъ и҆ ѡ҆бличи́тъ пра́востїю смирє́нныѧ землѝ, и҆ порази́тъ зе́млю сло́вомъ ᲂу҆́стъ свои́хъ и҆ дх҃омъ ᲂу҆сте́нъ ᲂу҆бїе́тъ нечести́ваго: 5 и҆ бꙋ́детъ препоѧ́санъ пра́вдою ѡ҆ чре́слѣхъ свои́хъ и҆ и҆́стиною ѡ҆бви́тъ по ре́брамъ свои̑мъ: 6 и҆ пасти́сѧ бꙋ́дꙋтъ вкꙋ́пѣ во́лкъ со а҆́гнцемъ, и҆ ры́сь почі́етъ со ко́злищемъ, и҆ теле́цъ и҆ ю҆не́цъ и҆ ле́въ вкꙋ́пѣ пасти́сѧ бꙋ́дꙋтъ, и҆ ѻ҆троча̀ ма́ло поведе́тъ ѧ҆̀: 7 и҆ во́лъ и҆ медвѣ́дь вкꙋ́пѣ пасти́сѧ бꙋ́дꙋтъ, и҆ вкꙋ́пѣ дѣ́ти и҆́хъ бꙋ́дꙋтъ, и҆ ле́въ а҆́ки во́лъ ꙗ҆́сти бꙋ́детъ плє́вы: 8 и҆ ѻ҆троча̀ мла́до на пещє́ры а҆́спїдѡвъ и҆ на ло́же и҆сча́дїй а҆́спїдскихъ рꙋ́кꙋ возложи́тъ: 9 и҆ не сотворѧ́тъ ѕла̀, ни возмо́гꙋтъ погꙋби́ти никого́же на горѣ̀ ст҃ѣ́й мое́й: ꙗ҆́кѡ напо́лнисѧ всѧ̀ землѧ̀ вѣ́дѣнїѧ гдⷭ҇нѧ, а҆́ки вода̀ мно́га покры̀ мо́ре. 10 И҆ бꙋ́детъ въ де́нь ѻ҆́ный ко́рень і҆ессе́овъ, и҆ востаѧ́й владѣ́ти ꙗ҆зы̑ки, на того̀ ꙗ҆зы́цы ᲂу҆пова́ти бꙋ́дꙋтъ: и҆ бꙋ́детъ поко́й є҆гѡ̀ че́сть.
Вар. 3:36–38
36 Се́й бг҃ъ на́шъ, не вмѣни́тсѧ и҆́нъ къ немꙋ̀. 37 И҆з̾ѡбрѣ́те всѧ́къ пꙋ́ть хи́трости и҆ дадѐ ю҆̀ і҆а́кѡвꙋ ѻ҆́трокꙋ своемꙋ̀ и҆ і҆и҃лю возлю́бленномꙋ ѿ негѡ̀. 38 Посе́мъ на землѝ ꙗ҆ви́сѧ и҆ съ человѣ̑ки поживѐ.
Вар. 4:1–4
1 Сїѧ̀ кни́га повелѣ́нїй бж҃їихъ и҆ зако́нъ сы́й во вѣ́къ: всѝ держа́щїисѧ є҆ѧ̀ въ живо́тъ (вни́дꙋтъ), ѡ҆ста́вившїи же ю҆̀ ᲂу҆́мрꙋтъ. 2 Ѡ҆брати́сѧ, і҆а́кѡве, и҆ и҆ми́сѧ є҆ѧ̀, ходѝ ко сїѧ́нїю прѧ́мѡ свѣ́та є҆ѧ̀. 3 Не да́ждь и҆но́мꙋ сла́вы твоеѧ̀, и҆ поле́зныхъ тебѣ̀ ꙗ҆зы́кꙋ чꙋжде́мꙋ. 4 Блаже́ни є҆смы̀, і҆и҃лю, ꙗ҆́кѡ ᲂу҆гѡ́днаѧ бг҃ꙋ на́мъ разꙋ̑мна сꙋ́ть.
Дан. 2:31–36, 44–45
31 Ты̀, царю̀ ви́дѣлъ є҆сѝ: и҆ сѐ, тѣ́ло є҆ди́но, ве́лїе тѣ́ло ѻ҆́но, и҆ ѡ҆бли́чїе є҆гѡ̀ высоко̀, стоѧ́що пред̾ лице́мъ твои́мъ, и҆ ѡ҆́бразъ є҆гѡ̀ стра́шенъ: 32 тѣ́ло, є҆гѡ́же глава̀ ѿ зла́та чи́ста, рꙋ́цѣ и҆ пє́рси и҆ мы̑шцы є҆гѡ̀ срє́брѧны, чре́во и҆ сте́гна мѣ̑дѧна, 33 го́лєни желѣ̑зны, но́зѣ, ча́сть ᲂу҆́бѡ нѣ́каѧ желѣ́зна и҆ ча́сть нѣ́каѧ скꙋде́льна: 34 ви́дѣлъ є҆сѝ, до́ндеже ѿто́ржесѧ ка́мень ѿ горы̀ без̾ рꙋ́къ, и҆ ᲂу҆да́ри тѣ́ло въ но́зѣ желѣ̑зны и҆ скꙋдє́льны, и҆ и҆стнѝ и҆̀хъ до конца̀: 35 тогда̀ сотро́шасѧ вкꙋ́пѣ скꙋде́ль, желѣ́зо, мѣ́дь, сребро̀ и҆ зла́то, и҆ бы́сть ꙗ҆́кѡ пра́хъ ѿ гꙋмна̀ лѣ́тнѧ: и҆ взѧ́тъ ѧ҆̀ премно́гїй вѣ́тръ, и҆ мѣ́сто не ѡ҆брѣ́тесѧ и҆̀мъ: ка́мень же порази́вый тѣ́ло бы́сть гора̀ вели́ка и҆ напо́лни всю̀ зе́млю. 36 Се́й є҆́сть со́нъ, а҆ сказа́нїе є҆гѡ̀ рече́мъ пред̾ царе́мъ. 44 И҆ во дне́хъ царе́й тѣ́хъ возста́витъ бг҃ъ нбⷭ҇ный ца́рство, є҆́же во вѣ́ки не разсы́плетсѧ, и҆ ца́рство є҆гѡ̀ лю́демъ и҆нѣ̑мъ не ѡ҆ста́нетсѧ, и҆стни́тъ и҆ развѣ́етъ всѧ̑ ца̑рства, то́е же ста́нетъ во вѣ́ки, 45 ꙗ҆́коже ви́дѣлъ є҆сѝ, ꙗ҆́кѡ ѿсѣче́сѧ ѿ горы̀ ка́мень без̾ рꙋ́къ и҆ и҆стнѝ гли́нꙋ, желѣ́зо, мѣ́дь, сребро̀, зла́то. Бг҃ъ вели́кїй возвѣстѝ царю̀, и҆̀мже подоба́етъ бы́ти по си́хъ: и҆ и҆́стиненъ со́нъ, и҆ вѣ́рно сказа́нїе є҆гѡ̀.
Ис.9:6–7
6 Ꙗ҆́кѡ ѻ҆троча̀ роди́сѧ на́мъ, сн҃ъ, и҆ даде́сѧ на́мъ, є҆гѡ́же нача́льство бы́сть на ра́мѣ є҆гѡ̀: и҆ нарица́етсѧ и҆́мѧ є҆гѡ̀: вели́ка совѣ́та а҆́гг҃лъ, чꙋ́денъ, совѣ́тникъ, бг҃ъ крѣ́пкїй, властели́нъ, кн҃зь ми́ра, ѻ҆ц҃ъ бꙋ́дꙋщагѡ вѣ́ка: приведꙋ́ бо ми́ръ на кнѧ̑зи, ми́ръ и҆ здра́вїе є҆мꙋ̀. 7 И҆ ве́лїе нача́льство є҆гѡ̀, и҆ ми́ра є҆гѡ̀ нѣ́сть предѣ́ла на прⷭ҇то́лѣ дв҃довѣ и҆ на црⷭ҇твѣ є҆гѡ̀, и҆спра́вити є҆̀ и҆ застꙋпи́ти є҆го̀ въ сꙋдѣ̀ и҆ пра́вдѣ, ѿнн҃ѣ и҆ до вѣ́ка: ре́вность гдⷭ҇а саваѡ́ѳа сотвори́тъ сїѧ̑.
Ис.7:10–16
10 И҆ приложѝ гдⷭ҇ь гл҃ати ко а҆ха́зꙋ, рекі́й: 11 просѝ себѣ̀ зна́менїѧ ѿ гдⷭ҇а бг҃а твоегѡ̀ во глꙋбинꙋ̀, и҆лѝ въ высотꙋ̀. 12 И҆ речѐ а҆ха́зъ: не и҆́мамъ проси́ти, нижѐ и҆скꙋшꙋ̀ гдⷭ҇а. 13 И҆ речѐ (и҆са́їа): слы́шите ᲂу҆̀бо, до́ме даві́довъ: є҆да̀ ма́ло ва́мъ є҆́сть трꙋ́дъ даѧ́ти человѣ́кѡмъ, и҆ ка́кѡ даетѐ гдⷭ҇еви трꙋ́дъ; 14 Сегѡ̀ ра́ди да́стъ гдⷭ҇ь са́мъ ва́мъ зна́менїе: сѐ, дв҃а во чре́вѣ зачне́тъ и҆ роди́тъ сн҃а, и҆ нарече́ши и҆́мѧ є҆мꙋ̀ є҆мманꙋ́илъ: 15 ма́сло и҆ ме́дъ снѣ́сть, пре́жде не́же разꙋмѣ́ти є҆мꙋ̀ и҆зво́лити ѕла̑ѧ, и҆лѝ и҆збра́ти благо́е: 16 занѐ пре́жде не́же разꙋмѣ́ти ѻ҆троча́ти благо́е и҆лѝ ѕло́е, ѿри́нетъ лꙋка́вое, є҆́же и҆збра́ти благо́е, и҆ ѡ҆ста́витсѧ землѧ̀, є҆ѧ́же ты̀ бои́шисѧ, ѿ лица̀ двꙋ́хъ царе́й.
Ис.8:1–4, 8–10
1 И҆ речѐ гдⷭ҇ь ко мнѣ̀: прїимѝ себѣ̀ сви́токъ но́въ вели́къ и҆ напишѝ въ не́мъ писа́ломъ человѣ́чимъ, є҆́же ско́рѡ плѣне́нїе сотвори́ти коры́стей, приспѣ́ бо: 2 и҆ свидѣ̑тели мнѣ̀ сотворѝ вѣ̑рны человѣ́ки, ᲂу҆рі́ю і҆ере́а и҆ заха́рїю сы́на варахі́ина. 3 И҆ пристꙋпи́хъ ко прⷪ҇ро́чицѣ, и҆ во чре́вѣ зача́тъ и҆ родѝ сы́на. И҆ речѐ гдⷭ҇ь мнѣ̀: нарцы̀ и҆́мѧ є҆мꙋ̀: ско́рѡ плѣнѝ, на́глѡ расхи́ти, 4 занѐ пре́жде не́же разꙋмѣ́ти ѻ҆троча́ти назва́ти ѻ҆тца̀ и҆лѝ ма́терь, прїи́метъ си́лꙋ дама́сковꙋ, и҆ кѡры́сти самарі̑йскїѧ пред̾ царе́мъ а҆ссѷрі́йскимъ. 8 и҆ ѿи́метъ ѿ і҆ꙋде́и человѣ́ка, и҆́же возмо́жетъ главꙋ̀ воздви́гнꙋти, и҆лѝ могꙋ́щаго что̀ соверши́ти: и҆ бꙋ́детъ по́лкъ є҆гѡ̀, во є҆́же напо́лнити ширинꙋ̀ страны̀ твоеѧ̀, съ на́ми бг҃ъ! 9 Разꙋмѣ́йте, ꙗ҆зы́цы, и҆ покарѧ́йтесѧ, ᲂу҆слы́шите да́же до послѣ́днихъ землѝ: могꙋ́щїи, покарѧ́йтесѧ: а҆́ще бо па́ки возмо́жете, па́ки побѣжде́ни бꙋ́дете, 10 и҆ и҆́же а҆́ще совѣ́тъ совѣща́ете, разори́тъ гдⷭ҇ь, и҆ сло́во, є҆́же а҆́ще возглаго́лете, не пребꙋ́детъ въ ва́съ, ꙗ҆́кѡ съ на́ми бг҃ъ.
По шестой песни:
И поется кондак и икос (или мученичен, аще несть).Стихи́:
Бог роди́ся, ма́ти же Деви́ца:
Что бо́льшее но́во друго́е тварь ви́де?
Деви́ца Мариа́м породи́ в два́десять пя́тый.
Ви́дев Человеколю́бец Бог ро́да челове́ческаго от диа́вола му́чима, умилосе́рдися, и посла́ а́нгела Своего́ Гаврии́ла рещи́ Пречи́стей Присноде́вей Мари́и: «Радуйся, Обра́дованная, Госпо́дь с Тобою». И а́бие зача́тся Госпо́дь наш и Бог, Сын и Сло́во Божие, в пречи́стем чре́ве Ея. И испо́лнися девяти́ ме́сяц от зача́тия Его́, и изы́де пвеление от ке́саря Августа написа́ти всю вселе́нную. И по́слан бысть Кирини́й во Иерусали́м и во Вифлио́мски преде́лы сотвори́ти написа́ние. И взы́де же Ио́сиф, храни́тель Богоро́дичный, с Не́юже написа́тися во Вифлео́ме. И зане́же хотя́ше роди́ти Де́вая, и не обрета́ше хра́мины мно́жества ра́ди лю́дий, и вни́де во убо́гий верте́п, та́мо роди́ Нетле́ннаго Го́спода на́шего Иисус Христа́, и пови́т его́, я́ко младе́нцы, вся́ческим Соде́теля, и положи́ Его́ в безслове́сных я́слех, И́же хотя́щаго нас изба́вити от безслове́сия.
В то́йже день поклоне́ние волхво́в
Стихи́:
Тебе́ поклоня́ющимся чино́м язы́ческих, Сло́ве,
Е́же к Тебе́ яви́ти язы́ком хотя́ше по́честь.
Во о́ны дни бысть не́кто волхв, глаго́лемый Валаа́м, в Пе́рсстей стране́, и волхву́я о ине́х мно́гих, рече́ и се: «Восия́ет звезда́ от Иа́кова, и погуби́т нача́льники Моави́тския». И́мут у́бо и друзи́и волсви́ таково́е проро́чество восприя́ти, и уча́ху вся царя́ Перси́дския. И до́йде и до сих триех́, и назира́ху, когда́ и́мут ви́дети звезду́ такову́ю, я́ко звездоблюсти́телие. Ви́деша же Христо́ву звезду́, я́ко не творя́ ше́ствия, я́ко и про́чая звезды́, от восто́ка и до за́пада, но я́ко к полу́дни, позна́ша сие́ бы́ти рожде́ние вели́каго царя́ пове́дает. И после́доваша звезде́, и обрето́ша Господа Христа́, и па́дше поклони́шася Ему́, и принесо́ша Ему́ да́ры, зла́то и лива́н и сми́рну. И та́ко повеле́нием а́нгеловым возврати́шася во страну́ свою́.
Уви́дев же И́род Иуде́йский от волхв, я́ко царь вели́к роди́ся и хо́щет весь мир покори́ти, призва́в волхвы́, и рече́: «Ше́дше испы́тно испыта́йте Отроча́ти, и да а́ще обря́щете, возвести́те ми, да и аз шед поклоню́ся Ем́у». Се же глаго́лаше, да уве́сть, где есть, да по́слет, е́же уби́ти Его́. И та́же призва́в кни́жники, вопроси́: «Где глаго́лет Писа́ние роди́тися Христу́?». Они́ же реко́ша ему́: «Во Вифлео́ме Иуде́йстем». Тогда́ посла́ во́ины своя уби́ти вся отроча́та, е́же от двою́ ле́ту и ни́жае. Того́ ра́ди по́слан бысть а́нгел от Бо́га, и рече́ Ио́сифу: «Воста́в, поими́ Отроча́ и Ма́терь Его́, и бежи́ во Еги́пет». Ио́сиф же сотвори́ та́ко: пои́м Отроча́ и Ма́терь Его́, и отъи́де во Еги́пет.
В то́йже день поуче́ние на Рождество́ Го́спода на́шего Иису́са Христа́
Приступи́те бра́тие и сы́нове, послу́шайте разу́мно, да скажу́ вам си́лу и честь сего́ дне, во́ньже посеще́ние бысть и обновле́ние ро́ду челове́ческому, впа́дшему пре́лестию диа́волею во истле́ние, преступле́нием за́поведи Бо́жия, я́коже бо положе́на пра́деду на́шему в раи́ дре́вле. За́вистию же диа́волею и невоздержа́нием отпаде́ сла́вы Бо́жия, и пи́щи ра́йския лише́н быв, в тле́нии сме́ртне жития́ сый, породи́ нас. И я́коже ви́де ны враг обна́жшася от сла́вы Бо́жия, нача́ мно́гими лестьми́ блазни́ти челове́ки, хотя́ укра́сти у Бо́га, разбо́ем, татьба́ми, блудо́м, и тре́бами и́дольскими, и ины́ми все́ми злыми де́лы, да бы ны я́ко сувра́жники Бо́гу сотворил. Но Ми́лостивый Госпо́дь Бог наш, не терпя́ зре́ти нас в толи́ко зло впа́дших, и не забы́ дела́ руку́ Свое́ю, но прекло́нь небеса́ сни́де за избавление на́ше, и в плоть на́шу облече́ся, хотя́ ю́ обожи́ти Свои́м Божество́м. И пелена́ми повивается я́ко Младенец, мгло́ю зе́млю повива́яй. И в я́слех ско́тиях возлеже́, почиваяй на ра́му херуви́мскую вы́ну, да ны изба́вит от ско́тскаго жития́. Того́ ра́ди ви́димо сый несозда́нный в созда́ние Свое́ вмести́ся, и неосяза́емый, ося́зан бысть. Сын Божий, Сын Челове́чь бысть. Не прело́жь Божества́ Своего́, и бысть Челове́к пло́тию: соверше́н у́бо Бог, и соверше́н Челове́к: пло́тию бо скрыв Божество́, сни́де на иска́ние на́ше. И обре́т заблу́ждьшее овча́, на ра́мо восприи́м, и ко Отцу́ принесе́: си́речь челове́чь соста́в, и́же бе пре́жде поги́бл. И на ра́дость созва́ а́нгельския си́лы, глаго́ля: Ра́дуйтеся со Мно́ю, я́ко обрето́х заблу́ждьшее Ми овча́.
Те́мже бра́тие до́лжни есмы́ и мы почти́ти сше́ствие Его́, и за́поведи Его при́сно соблюсти́: любо́вию друг дру́га почита́юще. Я́коже Сам написа́ и предаде́ нам в зако́не рекий: Не уби́й, не укра́ди, не прелюбы́ сотвори́, ни лжи. Чти отца́ твоего́ и ма́терь твою́, и да возлю́биши бли́жняго твоего́ я́ко сам себе́. Не и́же есть кто по ро́ду бли́жний, но вся́кий живу́щий в ве́ре Христо́ве. К сим же а́лчныя напита́ем, стра́нныя прие́млем, наги́я оде́ем. Бо́жия рабы́ че́стны твори́м, ти́и бо бдят о душа́х на́ших. К це́ркви потщи́мся день и нощь, та́мо очища́емся от грех. И трезви́мся отню́д, и та́ко с чистою со́вестию присту́пим к Телу Бо́жию и Кро́ви, не иму́ще вражды́ ни на кого́же. Не лице́мся лю́бяще, но се́рдцем и лице́м почита́юще друг дру́га, да бу́дем сы́нове Вы́шняго, и прича́стницы небе́сному Ца́рствию. В не́же позыва́я ны Сам прише́л есть Христо́с, И́стинный Сын Бо́жий Бог наш: сугу́б естество́м, равносла́вимь в Тро́ице, со Отце́м, и со Святы́м Ду́хом. Ами́нь.
В то́йже день поуче́ние о пречи́стых Та́йнах и о хотя́щих прича́ститися Те́лу и Кро́ви Христо́ве
Се ны́не хотя́щии приступи́ти к святе́й стра́шней Та́йне, разуме́йте бра́тие смы́сленно, каце́й святы́ни ны́не хо́щете причасти́тися. Ея́же со стра́хом трепе́щут а́нгельския си́лы, херуви́ми, и серафи́ми, и вси чи́ни гро́зно ужаса́ются, вознося́ще духо́вную же́ртву горе́ на небеса́. Тех бо образ иму́ще иере́и, предстоя́т стра́шней сей Трапе́зе, иде́же предлежи́т Те́ло и Кровь Сы́на Бо́жия, во́лею пло́ти и кро́ви на́шей прича́щшася нас де́ля, и хотя́ща прича́стники Себе́ сотвори́ти. И ве́дый не́мощь рода на́шего, я́ко не мо́жет мя́са кро́вава я́сти никто́же, ни кро́ви пи́ти: сего́ ра́ди преложи́ Те́ло Свое́ во святу́ю просфо́ру, и кровь в вино́, над ни́мже свята́я Та́йна соверша́ется. Да не мо́жем бра́тие друг дру́га уничижа́юще, приступити я́ко к про́сте ве́щи, не очи́стившеся от со́вестных грехов. Но та́ко присту́пим, чистото́ю просвети́вшеся, и трезве́нием украси́вшеся, любо́вию друг дру́га преспева́юще. Не челове́к бо сих сотворя́яй есть, но Бог неви́димою руко́ю, и стра́шною Си та́йною прича́стники ны сотворя́ет. И вмеща́яся в нас, о́бщники Си сотворя́ет ны Своего́ Ца́рствия. А и́же ли небреже́нием и не очи́стившеся и друг дру́га уничижа́юще приступа́ют прие́млюще Те́ло Бо́жие, недо́стойни Его́ су́ще и зре́ти, я́коже и Иу́да пре́жде сотвори́, то в лют неду́г впа́дают, и му́це пови́нни бу́дут. Те́мже молю́ и понужда́ю вы бра́тие, не сотвори́мся небреже́нием, и гру́бостию проти́вни Бо́гу: но день и нощь чи́стящеся поуча́емся. Да зде до́б́ре поживе́м, на стра́шнем Суде́ одесну́ю Престо́л Бо́жия яви́мся: о Христе́ Иису́се Го́споде на́шем, Ему́же сла́ва, ны́не и при́сно, и во ве́ки веко́в. Ами́нь.
Апостол на Литургии:
Гал. 209
4 [Заⷱ҇ 209] Є҆гда́ же прїи́де кончи́на лѣ́та, посла̀ бг҃ъ сн҃а своего̀ є҆диноро́днаго, ражда́емаго ѿ жены̀, быва́ема под̾ зако́номъ, 5 да подзакѡ́нныѧ и҆скꙋ́питъ, да всыновле́нїе воспрїи́мемъ. 6 И҆ поне́же є҆стѐ сн҃ове, посла̀ бг҃ъ дх҃а сн҃а своегѡ̀ въ сердца̀ ва́ша, вопїю́ща: а҆́вва ѻ҆́ч҃е. 7 Тѣ́мже ᲂу҆жѐ нѣ́си ра́бъ, но сы́нъ: а҆́ще ли же сы́нъ, и҆ наслѣ́дникъ бж҃їй і҆и҃съ хрⷭ҇то́мъ.
Евангелие на Литургии:
Мф. 2
18 [Заⷱ҇ 2] І҆и҃съ хрⷭ҇то́во ржⷭ҇тво̀ си́це бѣ̀: ѡ҆брꙋче́ннѣй бо бы́вши мт҃ри є҆гѡ̀ мр҃і́и і҆ѡ́сифови, пре́жде да́же не сни́тисѧ и҆́ма, ѡ҆брѣ́тесѧ и҆мꙋ́щи во чре́вѣ ѿ дх҃а ст҃а. 19 І҆ѡ́сифъ же мꙋ́жъ є҆ѧ̀, првⷣнъ сы́й и҆ не хотѧ̀ є҆ѧ̀ ѡ҆бличи́ти, восхотѣ̀ та́й пꙋсти́ти ю҆̀. 20 Сїѧ̑ же є҆мꙋ̀ помы́слившꙋ, сѐ, а҆́гг҃лъ гдⷭ҇ень во снѣ̀ ꙗ҆ви́сѧ є҆мꙋ̀, глаго́лѧ: і҆ѡ́сифе, сы́не дв҃довъ, не ᲂу҆бо́йсѧ прїѧ́ти мр҃їа́мъ жены̀ твоеѧ̀: ро́ждшеебосѧ въ не́й, ѿ дх҃а є҆́сть ст҃а: 21 роди́тъ же сн҃а, и҆ нарече́ши и҆́мѧ є҆мꙋ̀ і҆и҃съ: то́й бо сп҃се́тъ лю́ди своѧ̑ ѿ грѣ̑хъ и҆́хъ. 22 Сїе́ же всѐ бы́сть, да сбꙋ́детсѧ рече́нное ѿ гдⷭ҇а прⷪ҇ро́комъ, глаго́лющимъ: 23 сѐ, дв҃а во чре́вѣ прїи́метъ и҆ роди́тъ сн҃а, и҆ нарекꙋ́тъ и҆́мѧ є҆мꙋ̀ є҆мманꙋ́илъ, є҆́же є҆́сть сказа́емо: съ на́ми бг҃ъ. 24 Воста́въ же і҆ѡ́сифъ ѿ сна̀, сотворѝ ꙗ҆́коже повелѣ̀ є҆мꙋ̀ а҆́гг҃лъ гдⷭ҇ень, и҆ прїѧ́тъ женꙋ̀ свою̀, 25 и҆ не зна́ѧше є҆ѧ̀, до́ндеже родѝ сн҃а своего̀ пе́рвенца, и҆ наречѐ и҆́мѧ є҆мꙋ̀ і҆и҃съ.
Мф. 3
1 [Заⷱ҇ 3] І҆и҃сꙋ же ро́ждшꙋсѧ въ виѳлее́мѣ і҆ꙋде́йстѣмъ во дни̑ и҆́рѡда царѧ̀, сѐ, волсвѝ ѿ востѡ́къ прїидо́ша во і҆ерⷭ҇ли́мъ, глаго́люще: 2 гдѣ̀ є҆́сть рожде́йсѧ цр҃ь і҆ꙋде́йскїй; ви́дѣхомъ бо ѕвѣздꙋ̀ є҆гѡ̀ на восто́цѣ и҆ прїидо́хомъ поклони́тисѧ є҆мꙋ̀. 3 Слы́шавъ же и҆́рѡдъ ца́рь смꙋти́сѧ, и҆ ве́сь і҆ерⷭ҇ли́мъ съ ни́мъ. 4 И҆ собра́въ всѧ̑ первосвѧще́нники и҆ кни́жники людскі̑ѧ, вопроша́ше ѿ ни́хъ: гдѣ̀ хрⷭ҇то́съ ражда́етсѧ; 5 Ѻ҆ни́ же реко́ша є҆мꙋ̀: въ виѳлее́мѣ і҆ꙋде́йстѣмъ, та́кѡ бо пи́сано є҆́сть прⷪ҇ро́комъ: 6 и҆ ты̀, виѳлее́ме, землѐ і҆ꙋ́дова, ничи́мже ме́ньши є҆сѝ во влады́кахъ і҆ꙋ́довыхъ: и҆з̾ тебє́ бо и҆зы́детъ во́ждь, и҆́же ᲂу҆пасе́тъ лю́ди моѧ̑ і҆и҃лѧ. 7 Тогда̀ и҆́рѡдъ та́й призва̀ волхвы̀, и҆ и҆спы́товаше ѿ ни́хъ вре́мѧ ꙗ҆́вльшїѧсѧ ѕвѣзды̀, 8 и҆ посла́въ и҆̀хъ въ виѳлее́мъ, речѐ: ше́дше и҆спыта́йте и҆звѣ́стнѡ ѡ҆ ѻ҆троча́ти: є҆гда́ же ѡ҆брѧ́щете, возвѣсти́те мѝ, ꙗ҆́кѡ да и҆ а҆́зъ ше́дъ поклоню́сѧ є҆мꙋ̀. 9 Ѻ҆ни́ же послꙋ́шавше царѧ̀, и҆до́ша. И҆ сѐ, ѕвѣзда̀, ю҆́же ви́дѣша на восто́цѣ, и҆дѧ́ше пред̾ ни́ми, до́ндеже прише́дши ста̀ верхꙋ̀, и҆дѣ́же бѣ̀ ѻ҆троча̀. 10 Ви́дѣвше же ѕвѣздꙋ̀, возра́довашасѧ ра́достїю ве́лїею ѕѣлѡ̀, 11 и҆ прише́дше въ хра́минꙋ, ви́дѣша ѻ҆троча̀ съ мр҃і́ею мт҃рїю є҆гѡ̀, и҆ па́дше поклони́шасѧ є҆мꙋ̀: и҆ ѿве́рзше сокрѡ́вища своѧ̑, принесо́ша є҆мꙋ̀ да́ры, зла́то и҆ лїва́нъ и҆ смѵ́рнꙋ. 12 И҆ вѣ́сть прїе́мше во снѣ̀ не возврати́тисѧ ко и҆́рѡдꙋ, и҆ны́мъ пꙋте́мъ ѿидо́ша во странꙋ̀ свою̀.